Elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan búgingi Joldaýdyń mazmuny elge, halyqqa degen shynaıy qamqorlyqtyń aınymas dáleli bolyp tabylady. Sonymen birge, budan buryn belgilengen baǵdarlamalardy tabandy túrde iske asyrýdy kózdeıdi.
2019 jylǵy 1 qańtardan bastap tómengi eńbekaqyny bir jarym ese ulǵaıtý kózdelýde. Sol arqyly barlyq salalarda, barlyq menshik túrindegi kásiporyndarda jumys jasaıtyn 1,3 mıllıon adamnyń jalaqysy ulǵaıatyn bolady. Mundaǵy maqsat – adamdardyń qolaıly ómir súrýine tikeleı jaǵdaı jasaý.
Shynynda da, adam eńbek etkende ǵana tabysy ósedi. Sondyqtan, máselen, kúndelikti isinde jańa ádis-tásilderdi engizý qabyleti mol bólimshelik medısına qyzmetkeriniń jalaqysy eńbek nátıjesine qaraı kóterilip otyrady. Osy maqsatta aldaǵy jylǵa bıýdjetten 5 mıllıard teńge qarastyrylmaq.
Sol sııaqty, qazir mektep ákimshiligi jáne ata-analarmen jumys jasap júrgen muǵalimder óziniń tikeleı mindetine kóbine-kóp ýaqyt taba almaı qalady. Ustazdyq qyzmet – aýyr eńbek. Osyǵan oraı Elbasy aldaǵy jyly «Ustaz mártebesi týraly» Zań qabyldap, bul salada biliktilik talaptaryn oqytý ádisnamasyn, tárbıeshiler men bala baqshadaǵy ózge de qyzmetkerlerge eńbekaqy tóleý júıesin qaıta qaraý kerek ekenin atap kórsetti.
Elbasy qazaqstandyqtarǵa arnaǵan Joldaýynda aýyl turmysyn odan ári jaqsartýdy taǵy da erekshe atap ótti. "Nurly jol" baǵdarlamasy aıasynda sońǵy úsh jylda qalalar men aýyldardy baılanystyratyn 2400 shaqyrym avtojol salynyp, jóndeýden ótti. Al, 2020 jylǵa deıin avtojol salý kólemi odan eki eseden asyp túsedi. Kúni búginge deıin birqatar eldi mekenderde aýyz sý máselesi ótkir kúıinde qalýda. Sondyqtan aýyl-aımaqtaǵy sý problemasyn sheshý úshin bıýdjet mólsheri 100 mlrd. teńgege deıin kóbeıtiledi.
«Aýyl – el besigi» deı otyryp, Nursultan Ábishuly aýyldaǵy kásipkerlerdi jańa talaptarǵa saı jappaı oqytý júıesin qolǵa alý qajettigin atap kórsetti. Osy maqsatqa, sonyń ishinde ǵylymǵa jyl saıyn qosymsha shamamen 100 mıllıard teńge qarastyrý jóninde Úkimetke tapsyrma berildi. Bul oraıda ekonomıkanyń ınnovasııalyq jáne servıstik sektorlaryn damytýǵa erekshe kóńil bólinetin bolady.
Árıne, «Qazaqstan-2050» Strategııalyq baǵdarlamasyna negizdelgen búgingi Joldaýdyń qazaqstandyqtar úshin ıgilikti baǵyttary kóp. Sonyń ishinde aýyldyń, agrarlyq sektordyń damýyna sony serpin ákeletin tustary da mol.
Muhtar JUMAǴAZIEV,
Parlament Senatynyń depýtaty