Oblys ortalyǵyndaǵy Dostyq úıinde ótken jıynda Assambleıa jáne qoǵam ókilderi, jınalǵan qaýym «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Elbasynyń halyqqa arnaǵan kezekti Joldaýyn tikeleı efır arqyly kórip, tyńdady.
Jınalǵan jurtshylyqty Elbasynyń 2019 jyldyń 1 qańtarynan bastap eń tómengi jalaqyny 1,5 ese, ıaǵnı 28 myńnan 42 myńǵa deıin ósirý jónindegi Úkimetke bergen tapsyrmasy qýantty.
Negizinen, Joldaýdyń basty taqyryby el turǵyndarynyń ál-aýqatyn odan ári jaqsartýǵa arnaldy. Oblystyq «Atameken» Ulttyq kásipkerler palatasynyń dırektory Erbol Arynovtyń pikirinshe, eldiń ári qaraı damýy úshin- memlekettiń barlyq mehanızmderi jumys isteýi qajet.
Mysaly, Prezıdent óndirispen aınalysatyn ekonomıkanyń naqty sektoryn qoldaýdy mindettedi. Halyq tutynatyn taýarlardy shyǵarý qajettigin aıtty. Kóptegen taýarlardy shetelden satyp alatynymyz da ras. Oǵan sapanyń tómendigi, aınalym qarajatynyń azdyǵy da sebep bolar. Joldaýdan keıin kásipkerlik salasyna bólinetin qarajat ekonomıkanyń naqty sektoryna berilip, naqty nátıje berýi kerek dep esepteımin.
Erbol Arynovtyń aıtýynsha, Kásipkerler palatasy oblystaǵy shaǵyn jáne orta bıznestiń damýyna úles qosýda. Bıyl «Bastaý» jobasy boıynsha oblysta 1765 tyńdaýshyny oqytý jospary bar, ıaǵnı, nátıjesinde 353 bıznes-joba júzege aspaq. Qazirgi tańda quny 420,8 mıllıon teńgege 107 joba qarjylandyryldy. Osy jobalar arqyly jańa jumys oryndary ashylady. Jalpy, Ulttyq kásipkerler palatasy bıznesti qorǵaý, zańnamaǵa túzetýler engizý, bıznes shyǵyndary men tekserýdi qysqartý, bıznes ahýaldy jaqsartý boıynsha jumystar atqarýda.
Al, qalalyq máslıhat depýtaty, kásipker Qobylanbek Qojınniń aıtýynsha, qazirgi kezde kóshbasshy kásipkerler ózderiniń kásiporyndarynyń qyzmetin ári qaraı damytý úshin bıznes-jattyqtyrýshylar shaqyryp, ǵylymı tehnologııalarǵa júginýde. Ǵylym damymaı, bıznes te damymaıdy.
Qobylanbek Qojınniń pikirinshe, óńdeý ónerkásibi men shıkizattyq emes eksportty qoldaý maqsatymen aldaǵy 3 jylda qosymsha qarajat bólinse- bul eksporttyq áleýetti arttyryp, ishki naryqty otandyq taýarlarmen toltyrýǵa jol ashady.
Qalalyq máslıhattyń taǵy bir depýtaty, Abaı atyndaǵy daryndy balalarǵa arnalǵan №10 mekteptiń dırektory Samal Aıtqazınany aıtýynsha, mektepte oqýshylardyń «Zerde» ǵylymı uıymy, Ǵylymı jobalar, Olımpıada shyńy, Innovasııalyq ıdeıalar, Marafondar men saıystar atty jańashyl úıirmeler jumys jasaýda. Jan-jaqty jańashyl sabaqtar, jańashyl bilim júıesi-oqýshylarymyzdyń aldaǵy bolashaqqa degen arman-maqsattaryn búgingi kúnnen bastap qalaýda.
Búgingi Joldaýdy tyńdaǵan mektep muǵalimderin ujymyn bıýdjettik sala mamandary jalaqysynyń 35 paıyzǵa ósýi qýantty.
Kelesi jyly «Pedagog mártebesi týraly» zań engizilýi de qýanyshty jańalyq. Kópshilik elimizdiń bilim berý salasyndaǵy reformalar qashan toqtaıdy surap jatady. Mysaly, Nazarbaev zııatkerlik mektebiniń tájirıbesin alyp, jalpy bilim beretin mektepterinde engizilse. Sonda barlyq mektepter sapaly túrde, bir baǵytta jáne bir arnada jumys jasaıdy. Sondyqtan, Joldaýda balabaqshadan bastap joǵary oqý ornyna deıingi aralyqta bilim berýdiń jańa zaman talaptaryna saı qol jetkizýge basa nazar aýdaryldy.
Farıda BYQAI,
«Egemen Qazaqstan»
PAVLODAR