Ulttar lıgasyndaǵy kezekti oıynynda Qazaqstan quramasy Latvııamen teń oınady.
1-taım
Oıyn aldynda Qazaqstan quramasynyń oıynshylar tizimi shyǵysymen Sergeı Malyıdyń ortalyq qorǵaýshy bolyp, al Bahtıer Zaınýtdınovtyń ortada oınaıtynyn baıqadyq. Bul eki oıynshy negizgi quramda kúnde oınap júrgen fýtbolshylar emes edi. Bul eki oıynshynyń birden alańǵa shyǵýynyń da ózindik máni bar. Jasyl alańda aıaqdopshylar bir-birin jaqsy túsinisýi úshin olardyń klýbtyq deńgeıde de bir ujymda oınaǵany quptarlyq. Sol sekildi Sergeı Malyı shyǵysymen bizdiń qorǵanysymyz túgel «Astana» oıynshylarynan quraldy. Sebebi, onyń qasynda Abzal Beısebekov, Evgenııs Postnıkov, Dmıtrıı Shomko sekildi jigitter ornalasty. Al jartylaı qorǵanys «Qaırat» pen «Astananyń» qospasynan turdy. Bahtıer Zaınýtdınovtyń qasynda elordalyq Roman Murtazaev, sondaı-aq «Qaıratta» oınaıtyn Georgıı Jýkov, Islambek Qýat, Baýyrjan Islamhan boldy. Shabýyl shebinde sońǵy kezderi jankúıerler tarapynan syn sadaǵyna ilinip júrgen Alekseı Shetkın shyqty.
Match birden alma-kezek shabýyldarmen bastala ma degen oıymyz iske aspady. Kerisinshe, eki komanda bir-birin alystan baıqasyp, kóz súzisip júrdi. Tek aragidik alań ıeleri alystan soqqy baǵyttap otyrdy. Al oıynnyń 17-mınýtynda otandastarymyzdyń alǵashqy shabýyly birden golǵa aınaldy. «Astana» sapynda «Renn» qaqpasyna baspen gol soqqan Zaınýtdınov bul joly da belsendiligimen kózge tústi. Esepte alǵa shyqqan qazaqstandyq oıynshylar «Daýgava» stadıonynda óte senimdi qımyldaı bastady. Iá, bul bizdiń fýtbolshylardyń ádeti emes pe? Árqashan jeńiske jetip jatqanda odan ári ekilenip, shabyttana oınap ketetin. Bul joly da Baýyrjan Islamhan bastaǵan jartylaı qorǵaýshylar arly-berli pastar berip, qarsylastyń basyn shyr aınaldyrdy. Ortadaǵy oıynshylar birinshi taımdy óte jaqsy ótkizip jatqanynyń arqasynda qaptaldaǵy Jýkov pen Murtazaevtyń kóp qatelikteri bilinbeı jatty. Jalpy alǵanda oń qaptaldaǵy is-qımyldar kóńil-kónshite qoımady. Jaraqatynan aıyqqan Jýkov shynyn aıtqanda jaraqat alyp qalǵan Erkebulan Tuńǵyshbaevtyń ornyna shyqqan bolatyn. Al oǵan qaraǵanda quramada tájirıbıeli sanalatyn Abzal Beısebekovtiń shabýylǵa shyǵýǵa murshasy bolmaı jatty.
Kezdesýdiń 40-mınýtynda ortalyq qorǵaýshylardyń qateliginen qaqpamyzǵa gol endi. Boıy uzyn degen Sergeı Malyı men Evgenıı Postnıkovtar áýedegi dopqa talas barysynda dármensiz qaldy. Dopqa ıelik etken «Aqjaıyq» oıynshysy Artýr Karashaýskas qaqpamyzǵa gol soǵyp ketti.
2-taım
Ekinshi taım bastalysympen Qazaqstan quramasy dopqa kóp ıelik etip, qarsylasty aıyp alańyna tyqsyra berdi. Biraq, kóp shabýyldardyń eshqaısysy nátıje bermedi. Bas bapker Stnımır Stoılov sharshańqy júrgen Zaınýtdınovty alyp, ornyna Erkebulan Seıdahmetti shyǵardy. Erkosh oń qaptaldan oryn alyp, Georgıı Jýkov óziniń úırenshikti orny ortaǵa keldi. Islamhan-Jýkov juby kezinde jastar quramasynda keremet úılesip edi ǵoı. Alaıda, Jýkovtyń ortaǵa oıysqanyna on mınýt bolmaı, Baýyrjan Islamhan jaraqat alyp, amalsyz alańdaǵy ornyn bosatty. Stanımır bapker Islamhannyń ornyna oıynǵa Maksım Fedındi saldy. Fedın Qazaqstan quramasyndaǵy alǵashqy oıynyna shyǵyp, «Tobyldaǵy» pozısııasy sol qaptaldyń vıngeri qyzmetin atqara jóneldi. Al ol jerde oınap júrgen Murtazaev taza shabýylshyǵa aınaldy. Roman da on mınýttaı oınaǵan soń ornyn Baýyrjan Turysbekke bosatty. Osynyń barlyǵyn qarap otyryp, kóp pozısııada turaqty fýtbolshylar joq ekenin, oıyn barysynda bir orynda turaqty oınaıtyn fýtbolshylar kóp emestigin baıqaımyz. Quramamyzda tek qorǵaýshylar ǵana ózgerissiz oınady. Qalǵany túgel alańda oryndaryn almastyryp shyqty.
Esep 1:1, match teń aıaqtaldy. Al Grýzııa quramasy Andorrany 3:0 esebimen aıqyn jeńdi.
Ermuhamed MÁÝLEN,
Latvııadan