Astanadaǵy Ulttyq akademııalyq kitaphanada memleket jáne qoǵam qaıratkeri, fılologııa ǵylymdarynyń doktory, professor Myrzataı Joldasbekovpen kezdesý keshi jáne «Tulǵa barda, kitap bar» atty jeke kolleksııasynan kórme ótti.
Kórmege qalamgerdiń jeke kolleksııalaryndaǵy ordenderi men tósbelgileri, elimizge belgili avtorlardyń qoltańbasymen syıǵa berilgen kitaptary men jazýshynyń sońǵy jyldary jaryq kórgen eńbekteri qoıylady.
Budan 4 jyl buryn ómir boıy jınaǵan 10 myńnan astam kitabyn Ulttyq akademııalyq kitaphanaǵa syıǵa tartqan ǵalym bul joly da sodan bergi jınalǵan kitaptary men orden, medaldaryn ákelipti. Kórmege kórnekti tulǵanyń ár jyldary alǵan 79 medal, 4 ordeni qoıylǵan.
Kezdesý barysynda Myrzataı Joldasbekov sóz sóılep: «Maǵan bárinen de kitaptarym qymbat. Kóbi júrip ótken joldarymnyń kýásindeı ystyq. Onda nebir qazaqtyń marǵasqalarynyń qoltańbasy bar. Mysaly, Ábdildá Tájibaev bir kitabyna «О́zimniń ózegimnen jaralǵandaı Myrzataıyma!» dep jazypty, keıde kitaptarymdy aqtaryp, sol kisilerdi eske alamyn. Al, orden, medaldardy da túgelge jýyq Táýelsizdik kezeńinde alyppyn. Sonyń kóbin Elbasynyń qolynan alǵan ekenmin. Bularǵa qarap otyryp Táýelsizdikke shamamsha qyzmet etkenime táýbe deımin», – dedi.
Kezdesýde Mádenıet jáne sport mınıstrliginiń jaýapty hatshysy Qýatjan Áýlıev, belgili ǵalym Ǵarıfolla Esim, jazýshy Bolat Bodaýbaı jáne Qatımolla Berdiǵalıev, Aıgúl Úlkenbaeva, Uljan Baıbosynova sekildi óner qaıratkerleri qatysyp, aıtýly tulǵaǵa ystyq lebizderin aıtyp, jınalǵan kópke ónerden shashý shashty.
«Bul – urpaqqa ónege. Búgin osynda kelgen kórermender «bir adamda osynsha medal bar ma?» dep tańǵalysty. Onyń bári árıne, Táýelsiz elde tulǵanyń eńbeginiń baǵalanýyn kórsetedi. Shynymen urpaqqa úlgi bolarlyq is tyndyrǵan adamnyń el alqaýyna bólenetindigin kórsetedi. Bir ózi bir aýdannyń kitaphanasyndaǵy kitaptan kóp kitap syılaǵanynyń ózi ónege emes pe?», – deıdi kitap murajaıynyń jetekshisi Móldir Baımuqambetova.
Ularbek NURǴALYMULY,
«Egemen Qazaqstan»