Búgin sportpen aınalysyp, salaýatty ómir saltyn saqtaıtyn tórt myń adam qala kóshelerimen birinshi «Almaty jartylaı marafonyn» júgirip ótti. Oǵan Qazaqstan, AQSh, Fransııa, Japonııa, Reseı, Qyrǵyz Respýblıkasy men ózge elderdiń sportshylary qatysty.
Márege birinshi bolyp 10 km qashyqtyqqa júgirýden alǵa shyqqandar jetti. Erler arasynda Dmıtrıı Ivanchýkov (Merke q.), qyzdar arasynda Madına Kerımova, (Taldyqorǵan q.) birinshi bolyp eńserdi.
Eń júırik jartylaı marafonshy 21 km qashyqtyqtyqty baǵyndyrǵan Ilıa Tıapkın (Bıshkek q.) boldy. Al áıelder qatarynan erler arasyndaǵy absolıýtti chempıonnan nebári 8 mınýtqa artta qalǵan Sıtora Hamıdova (Termez q.) jeńipaz atandy.
- «Almaty jartylaı marafony» alǵash ret ótti. Endi, ol jyl saıyn kúzde uıymdastyrylady. Jarty jyldan keıin 21 sáýirde biz barlyq qatysýshylardy ondaǵan myń júgirýshi kútetin shara – «Almaty marafonynda» qarsy alamyz. Júgirý jarystarymyzdyń bári Ortalyq Azııadaǵy eń basty júgirý jarysyna daıyndyq aıasynda ótedi»,-dedi «Birinshi bolýǵa batyldyq» korporatıvtik qorynyń dırektory Saltanat Qazybaeva.
Jarys sóresine jasty 60-tan asqan 41 qatysýshy shyqsa, olardyń 16-sy jartylaı marafon qashyqtyǵyn eńserdi.
- Men júgirý jarystaryna burynnan beri qatysyp kelemin. Tek Almaty nemese Qazaqstanda emes, sonymen birge shetelde ótetin jarystarǵa úzbeı qatysýǵa tyrysamyn. Eshqashan munymen kásibı túrde aınalysqan joqpyn, degenmen, osy ýaqytqa deıin 150 000 km júgirdim, - deıdi jartylaı marafonnyń 71-jastaǵy qatysýshysy Marat Baltabaev. Marat Sháripuly jaqynda ardagerlerdiń I Azııa-Tynyq muhıty oıyndarynda 3 altyn alqa aldy. – Bizdiń uranymyz – «Sport-dinimiz, al júgirý - duǵamyz». Ony kún saıyn ustanamyz. Men barshańyzǵa sportpen shuǵyldanýǵa jáne ózderińizdi árqashan sergek ustaýǵa keńes beremin!
«Almaty jartylaı marafonynyń» ár qatysýshysy alqa aldy. 21 km qashyqtyqqa júgirýden absolıýtti chempıondar 1,5 mıllıon teńge kóleminde júlde qoryn ózara bólisti.