Astanada «Qazaqstannyń úzdik taýary» respýblıkalyq kórme-konkýrsy bolyp ótti. Ol eki kúnge sozylǵanymen, kórme jeńimpazdaryn aıqyndaý úshin daýys berý budan keıin bastalyp, qazan aıynyń 25-ine deıin júrgizilmek. Osylaısha kórme jeńimpazdaryn tutynýshy qarapaıym halyqtyń ózi aıqyndaıtyn bolady.
Kórme qarsańyndaǵy Ortalyq kommýnıkasııalar qyzmetinde ótken baspasóz máslıhatynda «Atameken» UKP Tóralqa tóraǵasy hatshylyǵynyń jetekshisi Lázzat Ramazanova bıylǵy kórme-baıqaýdyń erekshelikterin aıtyp bergen edi.
«Baıqaýǵa elimizdiń barlyq oblys ortalyqtarynda, Astana men Almaty qalalarynda maýsym men tamyz aralyǵynda ótken óńirlik kezeńderdiń 153 jeńimpaz kompanııasy qatysady. Bıyl biz jergilikti taýar óndirýshilerdi qoldaý maqsatynda tuńǵysh ret onlaın daýys berýdi qosyp otyrmyz. Aldymen saraptaý komıssııasy respýblıkalyq kórmege qatysýshylardyń ishinen 27 fınalısti anyqtaıdy. Munan keıin qazaqstandyq tutynýshylar 15-25 qazan aralyǵynda otandyq úzdik óndirýshige daýys bere alady», degen bolatyn ol.
Lázzat Ramazanovanyń aıtýynsha, óńirlik kezeńderge qatysýshylardyń jalpy sany bıyl 1163 kompanııany quraǵan. Demek bıylǵy qatysýshylar sany osyǵan deıingiden eki esege jýyq artyp otyr.
Al juma kúni bolyp ótken kórme-konkýrstyń saltanatty ashylýyna Investısııalar jáne damý mınıstri Jeńis Qasymbek pen «Atameken» UKP basqarma tóraǵasy Abylaı Myrzahmetov qatysty. Mınıstr Memleket basshysynyń Qazaqstan halqyna Joldaýynda qazaqstandyq kásiporyndardyń tutyný taýarlarynyń keń aýqymyn meńgerýine, bylaısha aıtqanda, «qarapaıym zattardyń ekonomıkasyn» damytýǵa nazar aýdarǵanyn atap ótti. «Qazaqstannyń úzdik taýary» baıqaýy tek sapa máselesin ózektendirip qoımaı, sonymen qatar kásiporyndardyń básekege qabilettiligin arttyrýǵa da kómektesedi.
«Búgingi tańda memleket bıznesti qoldaýǵa baǵyttalǵan, ásirese óńdeý sektoryndaǵy eksporttaýshylardyń ósimin yntalandyratyn birqatar keshendi júıelik sharalar qabyldaýda. Kóptegen qatysýshylar jáne árbir adam ózderiniń básekelesteriniń qalaı jumys isteıtinin, olardyń qandaı sapaly ónim shyǵaratynyn kóre alady. Biz jyl saıyn qatysýshylardyń sany ósip kele jatqanyn kórip otyrmyz, qazir qatysýshylardyń 80%-y jańa kompanııalar», dedi Jeńis Qasymbek.
«Atameken» UKP basqarma tóraǵasy Abylaı Myrzahmetov óz sózinde Memleket basshysynyń otandyq eksporttaýshylarǵa qoldaý kórsetý úshin 500 mlrd teńge jáne óndirýshilerge qoldaý kórsetý úshin 600 mlrd teńge bólý týraly tapsyrma bergenin eske saldy. Qazaqstandyq kompanııalardyń jańa naryqtarǵa shyǵýlary úshin 20 mıllıard dollarǵa jýyq qarjy olarǵa kómek retinde baǵyttalatyn bolady.
«Bıyl óńirlik baıqaýǵa 1163 kompanııa qatysty. Bul biz oılaǵannan da joǵary, tipti rekordtyq kórsetkish. Ulttyq palata otandyq taýarlardyń sapasy joǵary bolýyn, óndirýshilerdiń básekege qabiletti bolýyn kórmeniń basty maqsaty sanaıdy», dedi Abylaı Myrzahmetov.
Respýblıkalyq kórme aıasynda elorda turǵyndary men qonaqtaryna otandyq taýarlardyń keń aýqymy usynyldy. Kez kelgen turǵyn usynylǵan ónimderdiń dámin tatyp kóre alady jáne óndirýshilerdiń baǵasymen satyp ala alady. Sondaı-aq konkýrsta otandyq óndirýshilerdiń kıim-keshekteri, master-klastar jáne kelýshiler arasynda utys oıyndary uıymdastyryldy.
Baıqaýdy 2015 jyldan beri «Atameken» UKP uıymdastyryp keledi. Baıqaý úsh nomınasııa boıynsha ótkiziledi: «Úzdik óndiristik taýarlar»; «Halyqqa arnalǵan eń úzdik taýarlar» jáne «Eń úzdik azyq-túlik ónimderi».
Kórmede Abylaı Myrzahmetov pen Jeńis Qasymbek qatysýshylardyń taýarlarymen tanysa júrip, qyzylordalyq «Dalatex» fırmasynyń jeıdelerin satyp aldy. Kompanııa 2016 jyldan beri otandyq naryqta. Qazaqstannyń ár óńirinde ókildikteri bar, sonymen qosa ónimderin Reseıge eksporttaıdy.
«Biz osyndaı aýqymdy kórmege qatysqanymyzǵa qýanyshtymyz. Jeıdelerimiz sheteldik ónimderden kem emes, al baǵasy olarǵa qaraǵanda arzan, ıaǵnı qoljetimdi. Bıylǵy kórme jeńimpazy atanamyz degen úmitimiz de bar», dedi «Dalatex» JShS dırektory Dinmuhamed Abyzov.
«Bizde maqtanyp aıtýǵa turarlyq dúnıeler barshylyq. Otandastarymyz elimizde qandaı taýarlar óndiriletinin bile bermeıdi. Osy kórmeniń aıasynda múmkindiginshe otandyq taýarlarymyzdy kópshilikke tanystyrýdy maqsat tutyp otyrmyz», dedi «Atameken» UKP respýblıkalyq baıqaýlarynyń uıymdastyrýshysy Saltanat Ábdikárimova kórmeni ótkizý barysynda.
Bıyl jeńimpazdardy anyqtaý tártibi ózgergendigin joǵaryda aıttyq. Basty erekshelik – Qazaqstan turǵyndary endi úzdik óndirýshini anyqtaý úshin daýys bere alady. Osy maqsatta 15 qazan kúni saǵat 9:00-de www.altynsapa.kz saıty arqyly daýys berý bastalady. Ol 25 qazanǵa deıin jalǵasady. Marapattaý rásimi jeltoqsan aıynda ótedi.
«Qazaqstannyń úzdik taýary» baıqaýy otandyq óndirýshilerdi jandandyrý maqsatynda ótkiziletin dástúrli konkýrs bolyp tabylady. Uıymdastyrýshylardyń aıtýynsha, ol qazaqstandyq naryqty joǵary sapaly jáne básekege qabiletti ónimmen tolyqtyrýǵa kómektesedi.
Sonymen qatar konkýrs kásipkerlerge jańa seriktester tabýǵa jáne ımportty almastyrýǵa múmkindik beretin B2B-platforma bolyp tabylady.
Suńǵat ÁLIPBAI,
«Egemen Qazaqstan»