Juldyzdy qalashyqta jıyrma úı salynady

«Nýlevoı kvartal» kesheni men «Rossııa» qonaqúıindegi jumystarmen tanysqannan keıin Qazaqstan jaǵynan salynyp jatqan turǵyn úılerdiń qurylys barysyn kórdi.

Baıqońyr Reseıge jalǵa berilgendikten kúni keshege deıin elimizdiń ógeı qalasy sııaqty sezilip kelgen. Memleket basshysynyń tapsyrmasymen qazir munda turǵyn úıler men basqa da nysandar kóptep salynyp, qazaqstandyqtardyń úlesi elý prosentke jýyqtap qaldy.

Qazaqstan tarapynan salynyp jatqan kópqabatty turǵyn úılerdiń qurylysymen tanystyrǵan Qarmaqshy aýdany­nyń ákimi Sultan Maqashev biraz túıtkilder týraly da aıtyp berdi. Áý basta bul úılerdi jy­lýmen qamtamasyz etý úshin qalalyq jylý ortalyǵyna qospaq bolǵan. Alaıda bul joba tym qymbatqa túsetin bolǵandyqtan kógildir otynmen jylytylatyn jeke modýldi qazandyqtar qoıýǵa sheshim qabyldanǵan eken. Injenerlik ınfraqurylymdar respýblıkalyq bıýdjet esebinen salynyp jatyr. Búginde jylý, sý jáne káriz qubyrlary tartylýda. Jyl sońyna deıin paıdalanýǵa beriledi dep josparlanǵan kópqabatty turǵyn úıge eń aldymen halyqtyń áleýmettik jaǵynan az qamtylǵan otbasylar kóship kelýge tıis. Oblys áki­mi Qyrymbek Kósherbaev tur­ǵyn úı kezeginde turǵan bıýd­jettik qyzmetkerlerden bólek, «Báıterek» ǵaryshtyq zymyran kesheniniń mamandary da baspana ala alatyndyǵyn aıtty.

Qalaǵa qosymsha 20 kópqa­bat­ty úı salynbaq. Memlekettik baǵdarlama «7-20-25» jobasy da jolǵa qoıylady.

Sol kúni qaladaǵy №277 orta mektepte aımaqtaǵy bilim berý máseleleri talqylandy. Ob­lystyq bilim basqarmasynyń bas­shysy Maıra Meldebekova keshe­ge deıin jabyq qala bolyp kelgen juldyzdy qalashyqtaǵy jaǵ­daıdy tarqatyp berdi. Osyndaǵy 13 balabaqshanyń 12-si Reseıge tıesili eken. Tek bir balabaqsha ǵana qazaqstandyq bilim standarty boıynsha jumys istep keledi. Keler jyly qazaqstandyqtar tarapynan 3 balabaqsha salynyp, elimizdiń oqý baǵdarlamasymen jumys jasamaq.

Orta mektep jaǵdaıynda da sheshilmegen máseleler bar. Bilim basqarmasynyń basshysy Baı­qońyrda 1500 qazaqstandyq oqýshy Reseıdiń bilim standarty bo­ıynsha oqıtynyna toqtalǵan M.Meldebekova bul oqýshylardy ózi­mizdiń bilim berý júıesine kóshi­rýge ázirlik júrip jatqandyǵyn aıtty. Búginde bul másele Bilim já­ne ǵylym mınıstrliginiń qa­raýynda ekendigi, sonymen qatar 600 oryndyq jańa mektep sa­ly­natyndyǵy qaperge alyndy. Onyń aıtýynsha, Baıqońyrda 8 mektep qazaq­standyq bilim standarty boıyn­sha qazaq tilinde oqyp jatyr.

Premer-Mınıstrdiń birinshi orynbasary Asqar Mamın jul­dyzdy qalashyqta jasalyp jat­qan jumystarǵa oń baǵasyn berdi. Al Reseı bilim standartymen oqytylyp jatqan shákirtterdi ózimizdiń bilim júıesine kóshirý isi úkimetaralyq kelisimder negizinde júzege asyrylmaq.

Qalyń qazaq kıizdeı tutasyp otyrǵan óńirde ógeı baladaı kúı keship kelgen Baıqońyr qalasy tuǵyry bıik Otanyna osylaısha oralyp jatyr.

Baqtııar TAIJAN,

«Egemen Qazaqstan»

Qyzylorda oblysy