Kalınıngrad qalasynda «Reseıdiń sıfrlyq bolashaǵy» ınjenerlik-tehnıkalyq shyǵarmashylyq festıvali aıasynda robot tehnıkasy boıynsha ótken halyqaralyq chempıonatta Qaraǵandy oblysynyń komandasy úsh altyn jáne bir qola medal jeńip aldy.
Baıraqty dodada tuńǵysh ret baq synaǵan Qaraǵandy oblysy komandasynyń sapynda 10-15 jas aralyǵyndaǵy jeti oqýshy el namysyn qorǵady. Olardyń arasynda qaladaǵy №38 mektep-gımnazııanyń oqýshylary jáne «RoboClub» robot tehnıkasy mektebiniń tárbıelenýshileri boldy.
Qaraǵandylyq oqýshylar «Sýmo» jáne «Robofýtbol» atalymdary boıynsha kúsh synasqan bolatyn. Robottar sýmosy – «Lego» bólshekterinen qurastyrylǵan eki robottyń bir-birin belgilengen sheńberden yǵystyryp shyǵarýy baǵdarlamalanǵan pán. Al «Robofýtbolda» robottardan quralǵan eki komanda ózara saıysqa tústi. Olardyń maqsaty – belgilengen ýaqyt ishinde qarsylas qaqpaǵa meılinshe kóp gol soǵý.
Osymen ekinshi ret uıymdastyrylǵan chempıonat qorytyndysynda «Robofýtbol» atalymy boıynsha juptasyp óner kórsetken Davıd Shýralev pen Stanıslav Bone, Danııl Pınıgın jáne Evgenıı Lýkıanov, sondaı-aq Ilıa Povetın men Danııl Mýllerovtyń toby úzdik shyqty. Quramanyń eń jas múshesi 10 jasar Andreı Mashkın «Sýmo» atalymynda qola medalǵa qol jetkizdi.
Qaırat ÁBILDA,
«Egemen Qazaqstan»
QARAǴANDY