Argentınada jalaýy jelbiregen Jasóspirimder Olımpıadasy óz máresine taıap qaldy. On birinshi jarys kúni qazaqstandyq sportshylar úshin sátti ótti. Olar el qorjynyna 2 altyn, 1 kúmis jáne 1 qola júlde saldy.
Velosport jarysy boıynsha erler arasynda komandalyq synǵa qatysqan Gleb Brýsenskıı men Evgenıı Fedorov qarsylastarynan oq boıy alǵa ozyp, Jasóspirimder Olımpıadasynyń chempıony atandy. Sondaı-aq boksshy Aıbek Oralbaı (91 kılo) fınaldyq saıysta aljırlik Muhammed Ámın Hasıdti aıqyn basymdyqpen jeńip, Olımpıadanyń altyn júldesin ıelendi. Osy Olımpıadada kók baıraǵymyzdy ustap shyqqan Damır Toıbaı (+91 kılo) fınalda reseılik Alekseı Dronovten jeńilip, kúmispen shekteldi. Al qyzdar arasyndaǵy básekede Nadejda Rıabes qola júldeger atandy.
On bir kúnniń qorytyndysy boıynsha Qazaqstan quramasy medal sany boıynsha jalpykomandalyq esepte 8 medalmen (4 altyn, 2 kúmis, 2 qola) 14-orynda keledi. Alǵashqy orynda 56 medal (28, 16, 16) jıyntyǵyn toptaǵan Reseı quramasy tur.