«Qazposhtanyń» 25 jyldyǵyna oraı «Jazylýshylar kúni» uıymdastyryldy

«Gazet - halyqtyń kózi, qulaǵy hám tili» dep ult qaıratkeri Ahmet Baıtursynovsha aıtqanda, búgingi oqyrman úshin aqparat kózi, jańalyqtyń tynysy bolyp otyrǵan gazet-jýrnaldardyń ókilderi Almatydaǵy «Grand Park» saýda ortalyǵynda jańadan ashylǵan «Qazposhta» fılıalynda óz ónimderinen shaǵyn kórmeler uıymdastyryp, oqyrmandarmen qaýyshty. Fılıal dırektory Erjan Tasmuhan «Qazposhta» qyzmetiniń tutynýshylary men BAQ ókilderin aıtýly kúnmen quttyqtap, seriktestik saladaǵy jetistikterge alǵysyn bildirdi. Shırek ǵasyrǵa jýyq tarıhy bar otandyq poshta qyzmetiniń barysyna toqtalyp, aldaǵy josparlar jaıynda aqparat berip ótti. Búginde Almaty qalasynda júzden astam «Qazposhta» bólimderi jumys isteıdi.

Aldaǵy ýaqytta zamanaýı jabdyqtalǵan taǵy da 4 fılıal ashylatyn bolady. Jańa zamanǵy úderisterge oraı «Qazposhta» jyldam ári senimdi tasymaldaýshy retinde naryqtaǵy joǵary suranysqa ıe kompanııa mártebesi úshin árqashan qyzmet sapasyn jetildirip, tutynýshylarǵa qolaıly jaǵdaılar týǵyzyp otyrýdy maqsat etedi.

Shara aıasynda Áýezov aýdany ákiminiń orynbasary Qaırat Dastanuly, «Egemen Qazaqstan», «Kazahstanskaıa pravda», «Mysl» jýrnaly,  «Baldyrǵan» jýrnaly, «Drýjnye rebıata», t.b. basylymdardyń ókilderi sóz sóılep, «Qazposhta» qyzmetkerlerine quttyqtaý lebizderin bildirdi. «Egemenniń» turaqty oqyrmany, aqyn Jaras Sársek gazettiń oqyrman údesinen shyǵýdaǵy ózgeristerin quptaıtyndyǵyn aıtyp, aqparat aıdynyndaǵy qyzmetine sát-sapar tiledi. Búginde zaman suranysyna qaraı yńǵaılanyp bara jatqan gazetter qatarynan tabylatyn el gazeti jańa aıdarlarymen, tyń maqalalarymen erekshelenýde.

Suqbat alańyna aınalǵan «Qazposhta» fılıalyndaǵy merekelik shara konserttik baǵdarlamaǵa ulasty. Úzdik poshta qyzmetkerlerine, sonymen qatar turaqty oqyrmandarǵa arnaıy syılyqtar úlestirildi.

Elvıra Serikqyzy,

«Egemen Qazaqstan»

ALMATY