Elimizde birtindep e-HR júıesi engizilgeli jatyr. Osylaısha, 2019 jyldan bastap eńbek kelisimsharty onlaın-rejımde júrgiziletin bolady.
«Qazirgi ýaqytta jumys berýshi men jumys izdeýshiniń arasyndaǵy iskerlik qujattardy júrgizýdiń osyndaı amaly óte mańyzdy. Sebebi, olardyń birshama bóligi qashyqtyqta jumys isteıdi. Jýyq arada adamdarǵa jumysqa turý úshin tek jeke kýálik ǵana qajet bolady. Qalǵan qujattar derekqorda saqtalady», - dep habarlady QR Eńbek jáne halyqty áleýmettik qorǵaý mınıstrliginiń baspasóz qyzmetinen.
Belgili bolǵandaı, búgingi kúni atalǵan qyzmet jańartylǵan enbek.kz saıtynyń eń kóp kezdesetin túrine aınalǵan. Osylaısha, eńbektiń elektrondy bırja bazasynda sıfrly formattaǵy jumysshy profılin engizý júıesi men eńbek kelisimshartynyń esebi qurylady.
Eńbek jáne halyqty áleýmettik qorǵaý mınıstrliginiń ókilderi jumys berýshilerge jeke elektrondy isterdi qurýdy usynady. Jumysqa turý kezinde adamdar qujattar paketin usynǵan kezde olardyń JSN nómirin birden jeke málimetterdi óńdeýge jiberý usynylady. Osynyń arqasynda jumys berýshi tekserilgen elektrondy aqparatty, ıaǵnı sıfrly jeke isti ala alady. Ary qaraı onlaın rejımde jumysshynyń quzyretin rastaýǵa bolady.
Eńbek jáne halyqty áleýmettik qorǵaý vıse-mınıstri Narıman Muqyshev mundaı amal - ádis qaǵaz júzindegi áýreni joıýǵa, eńbek kitapshalarynan bas tartýǵa kómektesetinin aıtady.
«Osy júıe júzege asqan jaǵdaıda qazaqstandyqtar jumysqa tek jeke kýálikpen ǵana kire alatyndaı jaǵdaı jasalady. Dıplom jáne medısınalyq anyqtama sekildi basqa da qujattar málimetter bazasynda saqtalady. Biz qujattardy rásimdeý jumysyn jeńildetip, jumysshy men jumys berýshiniń arasyndaǵy ózara qarym-qatynasty elektrondy formatqa aýystyrǵymyz keledi. Máselen, eger adam jumystan shyǵyp qalsa, avtomatty túrde ony eńbektiń elektrondy bırjasyna shyǵara alamyz», - deıdi N.Muqyshev.
Iske asyrylatyn júıeniń tıimdiligin tekserý úshin pılotty joba bıyl búkil Qazaqstanda bastalyp ketken. Elektrondy eńbek kelisimshartyn tolyǵymen 2019 jyly ótý kózdelip otyr. Sondaı-aq, enbek.kz saıtynda ózin-ózi jumyspen qamtıtyn azamattar úshin elektrondy tirkeý júıesin engizý josparlanýda.