Qazaqstan Ortalyq Azııadaǵy tikeleı ınvestısııalardy tartý boıynsha kósh basynda. Jalpy kórsetkishtegi eldiń úlesi shamamen 70%-ti quraıdy. Bul týraly búgin Úkimettiń kezekti otyrysynda Investısııalar jáne damý mınıstri Jeńis Qasymbek málimdedi.
Investısııalyq klımatty jaqsartý men Qazaqstan ekonomıkasyna sheteldik ınvestısııalardy tartý boıynsha júrgizilip jatqan jumystar týraly baıandaǵan J. Qasymbek, bıyl 9 aıda negizgi kapıtalǵa salynǵan ınvestısııalardyń jalpy kólemi 21,6%-ke artyp, 7,5 trln teńgeni quraǵanyn jetkizdi. (2017 jyldyń 9 aıy boıynsha - 5,7 trıllıon teńge).
«Taý-ken ónerkásibinde (41,4%-ke), qurylysta (37,1% -ke) jáne óńdeý ónerkásibinde (26,4%) ósim baıqalada. Respýblıkalyq deńgeıde ınvestısııalardyń basym bóligi Atyraý (35,8%), Astana (9,2%), Almaty (6,5%) sııaqty óńirlerge tıesili. Investısııalardyń ósimi kóptegen óńirlerde baıqalady.Solardyń ishindegi úsh kóshbasshy óńirge Shymkent qalasy 2,8 ese, Atyraý qalasy 35,6% jáne Qaraǵandy oblysy - 28,5% kórsetkishke qol jetkizip otyr. Atalǵan merzim aralyǵynda Almaty (0,5%) men Jambyl (3,4%) oblystarynda ınvestısııa ósimi azaıǵan, al, Túrkistan (9,2%) oblysynda tómendeý baıqaldy»,- dedi Investısııalar jáne damý mınıstri.
Aıta keterligi, bıylǵy birinshi jartyjyldyqtyń qorytyndysy boıynsha tikeleı sheteldik ınvestısııalardyń jalpy kólemi 15,4%-ke ulǵaıyp, 12,3 mlrd dollardy qurady. Bul kórsetkish byltyrǵy 1-shi jartyjyldyqta 10,5 mlrd AQSh dollary shamasynda bolǵan edi.
Mınıstrlik keltirgen málimet boıynsha jalpy somasy 1,4 mlrd dollar bolatyn 12 joba iske asyrylý satysynda, bıyl onyń ishindegi quny 1 mlrd dollar bolatyn 8 joba qarqyndy túrde iske asyrylyp jatyr.
Mańyzdy jobalardyń ishinde ınvestısııa kólemi - 83 mln dollardy quraıtyn tehnıkalyq gaz óndiretin nemistiń Linde Group kompanııasyn, ınvestısııa kólemi - 165 mln dollardy quraıtyn kartop óńdeıtin gollandııalyq fırmany, ınvestısııa kólemi - 70 mln dollardy quraıtyn joǵary sapaly ák óndiretin belgııalyq Carmeuse Group kompanııasyn, ınvestısııa kólemi - 220 mln dollar bolatyn soda kúlin óndiretin túriktiń Yildirim Holding kompanııasyn, ınvestısııalarynyń kólemi - 194 mln dollar bolat qubyrlaryn shyǵaratyn qytaıdyń CNPC jáne sement óndiretin China Gezhouba Cem kompanııalaryn ataýǵa bolady.