Qazannyń 22-nen 23-shi juldyzyna qaraǵan túni «Nursultan Nazarbaev» halyqaralyq áýejaıynda Býenos-Aırestegi (Argentına) úshinshi jasóspirimder Olımpıadasyna qatysqan sporttyq delegasııany saltanatty túrde qarsy alý rásimi ótti.
Uzaq joldan sharshaǵanyna qaramastan, jas atletter týystary men jaqyndarynyń quttyqtaýyna rıza bolyp, BAQ ókilderine emen-jarqyn suhbat berdi.
«Qazirgi kóńil-kúıimdi sózben jetkize almaımyn. Tún jarymyna qaramastan bizdi kútip alýǵa qansha adam kelgen?! Tipti, kózime jas aldym. Bizge qoldaý kórsetip, biz úshin taqym qysqan barsha aǵaıynǵa rahmet! Jankúıerlerdiń senim údesinen shyǵa alǵanymyz úlken baqyt», - deıdi Olımpıada chempıony, velosportshy Gleb Brýsenskıı.
«Dál osylaı qarsy alǵany úshin rahmet! Árıne, bizdi kútip alatynyn bildik. Biraq tap osynsha adam jınalady dep oılamaǵan ek. Kóp rahmet!», - deıdi Glebtiń komandalasy Evgenıı Fedorov.
«Elimizge oraldyq. Elde kútip alǵan kisilerge kópten-kóp rahmet! Jeńisti kúnderimiz kóp bolsyn! Alǵa, Qazaqstan!», - deıdi dzıýdodan altyn júldeger atanǵan Bekarys Sádýaqas.
Qazaqstan qurama komandasy sapyndaǵy eń jas sportshylardyń biri Roza Abıtova halyqaralyq komanda sapynda Olımpıadanyń kúmis júldegeri atandy. Ol ózine qoldaý kórsetken jankúıerlerge alǵysyn aıtyp, rızashylyǵyn bildirdi.
«Jyraqta júrip jeńip alǵan medaldiń qanshalyqty baǵaly ekenin elge kelgen soń túsinesiń. Mundaı sátterde saǵan kórsetilgen qoldaý óte mańyzdy. Elimizde biz úshin qýanatyn adamdar kóp. Mine, sol jandar úshin de jeńiske jetkim keledi. Alǵa, Qazaqstan!», - dep aǵynan jaryldy dzıýdodan jasóspirimder Olımpıadasynyń kúmis júldegeri Margarıta Grısenko.
Jasóspirimder Olımpıadasynyń qola júldegeri Stella Sýhanova da komandalastarynyń tilegine qosylyp, jankúıerlerge basyn ıdi.
Eske sala keteıik, Býenos-Aıreste Qazaqstan sportshylary tórt altyn, úsh kúmis jáne úsh qola medal jeńip aldy. Odan bólek, halyqaralyq komanda sapynda jas sportshylarymyz 1 kúmis jáne 1 qola medal ıelendi. Altyn júldegerler: Bekarys Sádýaqas (dzıýdo), Dıas Bahraddın (eskek esý), Gleb Brýsenskıı men Evgenıı Fedorov (velosport), Aıbek Oralbaı (boks). Kúmis júldegerler: Damır Toıbaı (boks), Talǵat Sháıken (boks), Margarıta Grısenko (dzıýdo). Qola júldegerler: Nadejda Rıabes (boks), Stella Sýhanova (eskek esý), Ábilmansur Batyrǵalı (karate). Halyqaralyq komanda sapynda Roza Abıtova (kórkem gımnastıka) kúmis, Bekarys Sádýaqas (dzıýdo) qola medal jeńip aldy.