2018 jyly 24 qazanda Avstrııanyń Zalsbýrg ýnıversıtetinde «Iаdrosyz bolashaq» syılyǵynyń (Nuclear-Free Future Award – NFFA) marapattaý rásimi aıasynda qazaqstandyq sýretshi, halyqaralyq antııadrolyq qozǵalysynyń belsendisi, «ATOM Jobasynyń» Qurmetti elshisi Káripbek Kúıikov marapattaldy, dep habarlaıdy SIM baspasóz qyzmeti.
Qazaqstannyń Avstrııadaǵy Elshisi Qaırat Sarybaı «Iаdrosyz bolashaq» syılyǵynyń ıegerlerin antııadrolyq qyzmetteriniń joǵary baǵa alýymen quttyqtap, Káripbek Kúıikovtyń marapattalýy ıadrolyq qarýsyzdandyrý men taratpaý jahandyq úderisterinde Qazaqstan róli jáne Memleket basshysy N.Nazarbaevtyń bastamalarynyń moıyndalýyn bildiredi dep atap ótti. Elshi barlyq qatysýshylardy álemniń ıadrolyq jarylystardan qutylý úshin kúsh salýǵa baǵyttalǵan «ATOM Jobasy» onlaın - petısııasyna ózderiniń qolyn qoıýǵa shaqyrdy.
Qazaqstandyq ókilmen qatar, Avstralııa, Ulybrıtanııa, Fransııa jáne Avstrııanyń ókilderi de syılyqtyń ıegerleri bolyp ataldy.
Káripbek Kúıikov – 2012 jyly Qazaqstan Respýblıkasynyń Prezıdenti N.Nazarbaev bastamashylyq jasaǵan «ATOM Jobasynyń» Qurmetti Elshisi bolyp tabylady. Jobanyń mıssııasy – ıadrolyq synaqtarǵa jappaı tyıym salý jáne barlyq elderdiń ıadrolyq qarýdy tolyq joıýǵa jahandyq qoǵamdyq qoldaýdy biriktirý.
«Iаdrosyz bolashaq» syılyǵy 1998 jyly Frans Moll qorymen quryldy jáne antııadrolyq belsendilerdiń, uıymdardyń jáne qaýymdastyqtardyń qyzmetin yntalandyrýǵa baǵyttalǵan. Bıylǵy jyly syılyqtyń 20 jyldyǵy atap ótilýde.
Buryn álemniń 80-nen astam ókilderi men uıymdary atalǵan syılyqqa ıe bolǵan, sonyń ishinde Qazaqstannan - Iýrıı Kýıdın, fotojýrnalıst, «Nevada-Semeı» ıadrolyqqa qarsy qozǵalysynyń seriktesi, Dúnıejúzilik atom fotograftary gıldııasynyń múshesi, ıadrolyq taqyryp boıynsha kóptegen fotoalbomdardyń avtory (2000j. marapattalǵan).