Slovenııanyń Prımorsk óńirindegi Povır eldi mekeninde Iýgoslavııa partızandarymen birge shaıqasqan jáne 1943 jyly fashızmge qarsy kúreste óz ómirin qıǵan qazaqstandyq qaharman «Kassa Seberony» eske alý saltanatty jıyny ótti.
Qazaqstan ardagerler keńesiniń tóraǵasy, Parlament Májilisiniń depýtaty Baqtyqoja Izmuhambetov 75 jyl boıy Qazaqstan jaýyngeriniń jadyna uqypty qaraǵany jáne onyń qabirine jasaǵan qamqorlyǵy úshin Povır eldi mekeniniń turǵyndaryna jáne búkil Slovenııa halqyna Qazaqstan halqynyń shynaıy alǵysyn bildirdi.
Slovenııanyń burynǵy Qorǵanys mınıstri, qazirgi Sejana kommýna basshysynyń orynbasary Lıýbısa Elýshıch jergilikti zertteýshilerdiń kóp atqarǵan eńbekteri týraly aıtyp berdi. Partızan-seriktesteriniń jazbasha memýarlary, sondaı-aq kýágerlerdiń urpaqtan urpaqqa jetkizgen áńgimeleri, sonyń ishinde jaralanǵan jaýyngerge qoldaý kórsetken qyz Cheh Karolınanyń áńgimeleri «Kasse Sebero» Qazaqstannan shyqqanyn senimdi túrde dáleldeıdi. Dinı qyzmetker Iozef Mılıchtiń qaıtys bolǵandardy tirkeý kitabynda júrgizgen jazbasyna sáıkes «Kassa Sebero» Qazaqstannyń Oktıabr aýdanynyń Baǵanat kolhozynan shyqqan.
Qazaqstan Respýblıkasynyń Slovenııadaǵy (qosa atqarýshy) Elshisi Qaırat Sarybaı qatysýshylarǵa Qazaqstan-Slovenııa arasyndaǵy qarqyndy damyǵan qarym-qatynastary týraly aıta otyryp, eske alý sharalaryn uıymdastyrýdaǵy yntymaqtastyq úshin sloven seriktesterine alǵysyn bildirdi.
Sondaı-aq, jıynda Reseıdiń Slovenııadaǵy Elshisi D.Zavgaev, Sejana kommýnasynyń basshysy D.Terchon jáne Povır eldi mekeniniń basshysy F.Ýrsıch sóz sóıledi. Slovenııaǵa QR Parlamenty Májilisiniń depýtaty, general-leıtenant A.Tasbolatov, QR Qorǵanys mınıstrliginiń ofıserleri, QR GFR-daǵy Áskerı attashesi jáne Eýropadaǵy joǵary áskerı oqý oryndarynda bilim alyp júrgen ofıserleri bar ókiletti delegasııa jaýynger jadyna taǵzym bildirý úshin keldi.
Eske alý sharasy aıasynda «Jyraqta jatsań da, óshpes erligiń elińniń jadynda» degen sózder jazylǵan memorıaldy taqta ornatyldy, sondaı-aq Qazaqstannyń Ulttyq Panteonynan alynǵan jeri bar kapsýla qoıyldy. Jergilikti turǵyndar jaýyngerdiń qabirine gúl shoǵyrlary men Qazaqstannan aldyrǵan jerdi salýda erekshe jylý men tolqýdy týdyrdy.
Is-shara barysynda qatysýshylarǵa Astananyń 20 jyldyǵyna arnalǵan fotokórme, «Jaý júrek myń bala» fılmi kórsetildi. Is-shara QR Qurmetti konsýldary Dımıtrııa Pısıga (Novo-Gorısa) men Goraz Shıfrer (Marıbor), Sejana kommýnasynyń Úkimeti jáne Qazaqstan-Slovenııa bıznes klýbynyń qoldaýymen uıymdastyryldy.