Qyzylorda oblysynda turǵyn úı kezeginde 27 myń otbasy tursa, onyń 23 myńy Qyzylorda qalasyna tıesili. Osynsha otbasy úı-jaıyn sheshý úshin óz jaǵdaıyna tıimdi joldardy izdeıdi.
Ipotekalyq baǵdarlamalar eldiń bárine birdeı qoljetimdi emes. Kóptegen otbasy aı saıyn belgilengen qarjyny tóleýge qabiletti bolǵanymen bank usynǵan alǵashqy 20-30 paıyz jarnany tóleýge aqshasynyń basyn quraı almaıdy. Búginde aıdalada jatqan batpan quıryq joq. Baıaǵy asta-tók zamandaǵydaı tegin páterlerdiń berilmeıtindigin Memleket basshysy da qadap aıtqan. Bar qarjysyna turǵyn úı qurylysyn salyp, eseleýdi maqsat tutqan ınvestor ondaı táýekelge bara almaıdy. «Úıdegi kóńildi bazardaǵy naryq buzady» degendeı, búgingi zaman basqa. Turǵyn úı salýdyń qanshalyqty mashaqaty, táýekeli baryna salymshylardan qarjy jınap alyp, basyna tartsa etekke jetkize almaı, boryshqa batqan kásiporyndar jaqsy mysal bolady. Investorlardyń tegin úı salyp berýge qulyqsyzdyǵyn osydan-aq shamalaı berińiz.
Al «óz úıim – óleń tósegimsiz» ómir – ómir emes. Bastapqy qarjyny quıýǵa shamasy jetpeıtinder qaıtpek kerek?!
Qyzylorda oblysynyń ákimi Qyrymbek Kósherbaev osy sharýanyń retin keltirdi.
О́ńirde bastapqy tólemsiz turǵyn úı alýǵa múmkindik beretin «Orda» turǵyn úı qurylysynyń Jol kartasy ázirlengenin oblys ákimi halyqqa esep berý kezdesýinde aıtqan edi.
«Biz óńir turǵyndarynyń áleýmettik osal tobyn meılinshe qoljetimdi turǵyn úımen qamtamasyz etýdi maqsat etip qoıdyq. Sol úshin 2017 jyly 3 jylǵa eseptelgen «Orda» turǵyn úı qurylysynyń Jol kartasyn ázirledik. Nesıelik turǵyn úıdiń kópbalaly otbasylar, múmkindigi shekteýli jáne áleýmettik az qamtylǵan toptarynyń barlyǵyna birdeı qoljetimdi emestigin eskerip, «Nurly jer» baǵdarlamasy aıasynda salynyp jatqan nesıelik turǵyn úılerdi jergilikti bıýdjet esebinen satyp alýǵa jyl saıyn oblystyq bıýdjetten 2 mlrd teńgeden qarjy bólý týraly sheshim qabyldadyq», dedi ol.
Oblys ákiminiń bastamasy qalaı oryndalyp jatqandyǵy jýyrda «Nur Otan» oblystyq fılıaly ǵımaratynda ótken brıfıngte de jan-jaqty túsindirilgen.
Oblysta «Nur Otan» partııasynyń bastaýymen bıýdjettik sala qyzmetkerlerine arnalǵan «Qamqor baspana» jáne jas otbasylarǵa arnalǵan «Jas arman» jobalary qolǵa alyndy. Bul baǵytta alǵashqy jarna 20 paıyzdyń 10%-y oblystyq bıýdjetten uzaq merzimge, kómek retinde beriledi. Negizi, «Nurly jol» memlekettik baǵdarlamasy aıasynda 2018 jyly turǵyn úı qurylysyna 14 mlrd teńge qaralǵan. Onyń 6,1 mlrd teńgesi turǵyn úı qurylysyna, 7,9 mlrd teńgesi ınjenerlik-kommýnıkasııalyq ınfraqurylymnyń 50 jobasyna bólindi. Oblys boıynsha 1747 páterge arnalǵan 69 úıdiń qurylysy júrgizilip jatyr.
Sala mamandary qatysqan jıynda:
– Qyzylorda qalasynyń sol jaǵalaýynan 18 kópqabatty turǵyn úı jeke ınvestorlar esebinen salynyp jatyr. 14 úıdiń 4 jáne 5-shi qabattarynda 248 páter «Orda» baǵdarlamasyna qatysady. Jergilikti atqarýshy organdar jeke ınvestorlardan osy páterlerdi satyp alady. Turǵyn úıge muqtaj otbasylar jáne osy baǵdarlamaǵa qatysýshylar «Turǵyn úı qurylys jınaq banki» AQ-ta depozıt ashý kerek. Bizdiń maqsatymyz – óńirdegi áleýmettik osal toptaǵy otbasylar úshin turǵyn úıdi qoljetimdi etý, – dedi oblys ákiminiń orynbasary Serik Súleımenov.
Baǵdarlama sharttaryna sáıkes kópbalaly jáne tolyq emes otbasy, múmkindigi shekteýli jandar nemese múmkindigi shekteýli bala tárbıeleýshi otbasy, jetim balalar men ata-anasynyń qamqorlyǵynsyz qalǵan balalar, I, II toptaǵy múgedekter, jat jurttardan kelgen qandastarymyz, memlekettik qyzmetshiler jáne 35 jasqa deıingi eki jyl nekede turǵan jas otbasylar bastapqy tólemsiz qatysa alady.
«Orda» baǵdarlamasynyń artyqshylyǵy, osy sanatqa jatatyn otbasylar eshqandaı aldyn ala 20-30 paıyz tólemsiz eki bólmeli páterdi aı saıyn 42 myń teńge, úsh bólmeli páterdi 52 myń teńge tóleı otyryp ala alady. Basynda úıi joqtar budan kóp qarjyǵa páter jaldap turatyndyǵyn eskersek, bul áleýmettik jaǵynan az qorǵalǵan otbasylar úshin aıryqsha jeńildik. Aıta keteıik, Qyzylorda oblysynyń bul tájirıbesi Úkimet tarapynan basqa oblystarǵa da taratýǵa usynyldy.
Memleket basshysynyń halyqty turǵyn úımen qamtý týraly tapsyrmasy Qyzylorda oblysynda osylaısha oryndalyp jatyr.
Baqtııar TAIJAN,
«Egemen Qazaqstan»
Qyzylorda oblysy