Oral qalasynyń irgesinde «Sayat» etnotýrıstik ortalyǵy ashyldy. О́ńirdegi belgili kásipker, mesenat Murat Jákibaev uıymdastyrǵan bul ortalyqtyń maqsaty – ishki týrızmdi damytý, óńirdiń tabıǵı baılyǵy men baı mádenıetin belsendi demalys arqyly nasıhattaý.
Elbasy bıylǵy Joldaýynda «Baı tabıǵatymyz ben mádenı áleýetimizdi paıdalaný úshin syrttan keletin jáne ishki týrızmdi damytýǵa erekshe kóńil bólý qajet. Úkimet qysqa merzimde salalyq memlekettik baǵdarlama qabyldaýǵa tıis» degen bolatyn. Batys Qazaqstan oblysynda ashylǵan etnotýrıstik ortalyq dál osy maqsat údesinen shyqqan.
– Prezıdent óńirlerdi damytýdyń bir joly ishki jáne syrtqy týrızmdi damytý ekendigin jıi aıtyp keledi. Álemdegi 10 jumys ornynyń bireýi dál osy salaǵa tıesili. Biz búgin óńirimiz úshin erekshe oıǵaǵa – etno-týrıstik ortalyqtyń ashylý saltanatyna tap keldik. Búginnen bastap bizdiń óńirdiń ishki týrızm salasy jańa beleske shyqty dep aıtýǵa bolady. Shynyn aıtsaq, bizdiń óńirde tarıhı oryndar, erekshe eskertkishter óte kóp. Alys-jaqyn shetelden kelgen meımandarǵa, óz elimizdiń ózge óńirlerinen keletin qonaqtarǵa kórsetýge laıyq sáýlet jáne tabıǵat eskertkishteri, tarıhı mańyzy bar oryndar az emes. Aıta keteıin, osy ortalyqtyń aýmaǵynda Qazaqstan halqy Assambleıasynyń «Meniń Elim» atty etnoaýylyn ashý josparda tur. Ol jerde bizdiń óńirdi mekendeıtin barlyq ulttyń mádenıeti kórinis tabady. Sheteldikter úshin bul óte qyzyqty, sondyqtan týrıster kóp tartylady dep oılaımyn, – dedi óńir basshysy Altaı Kólginov.
Jańa etnotýrıstik ortalyq sporttyq, emdik-saýyqtyrý jáne tanymdyq baǵytta qyzmet kórsetpek. Bul jerde atqa salt miný daǵdysyna úırenýge, at sportynyń olımpıadalyq túrlerine jattyǵýǵa, tanymdyq ekskýrsııalar jasaýǵa bolady. Sondaı-aq ulttyq at sporty túrleri men ıppoterapııa da «Sayat» ortalyǵynyń ereksheliginiń biri. Jaqyn arada bul jerde sýda qaıyqpen qydyrý, jaıaý serýen, velotýrızm men qysta shańǵy tebý jolǵa qoıylmaq. О́zenniń jaǵasy, toǵaıdyń ishinde ornalasqan etnotýrıstik ortalyqtyń jaǵrapııalyq jaǵdaıynyń ózi joǵaryda atalǵan demalys túrlerin damytýǵa qolaıly múmkindik berip tur.
Oral qalasynyń irgesinde, 12-aq shaqyrym jerde, tabıǵattyń ásem múıisinde ornalasqan «Sayat» ortalyǵynda 22 jylqyǵa arnalǵan atqora, jabyq manej bar. Kelýshiler demalatyn qonaq bólmeleri, dýsh, kir jýatyn oryn, ashana jáne oqytý klasy da qarastyrylǵan.
– Bizdiń maqsatymyz – ólkemizdiń týrıstik áleýetin ashyp kórsetip, zamanaýı standarttar negizinde belsendi demalysty qalaıtyn azamattarǵa qyzmet kórsetý, memleket-jekemenshik seriktestigi aıasynda elimizdiń týrıstik klasterin damytý. Bul jerde sábıden qarııaǵa deıingi kelýshilerge qyzyqty baǵdarlamalar oılastyrylǵan, – deıdi osy keshen ıdeıasynyń avtory, kásipker Murat Jákibaev. «Bıznestiń jol kartasy-2020» baǵdarlamasy aıasynda salynǵan keshen qurylysyna 300 mln teńge qarjy ketipti.
– Aýmaǵy 5 ga jerdi alyp jatqan etno-týrıstik ortalyqta qazirdiń ózinde túrli jarystar ótkizýge bolady, oǵan qajetti ártúrli alańdar, qural-jabdyqtar bar. Jylqylarǵa keremet jaǵdaı jasalǵan. Keshen jarystar ótkizýge, belsendi demalys uıymdastyrýǵa jáne ıppoterapııa júrgizýge tolyq sáıkes keledi, – deıdi keshenniń ashylý saltanatyna arnaıy kelgen almatylyq maman, Qazaqstan at sporty federasııasynyń ókili Iаna Kamenskaıa.
Qazbek QUTTYMURATULY,
«Egemen Qazaqstan»
Batys Qazaqstan oblysy