Elordadaǵy «Dáýlet» sport kesheninde «Konfederasııa Kýbogy-2018» týrnıriniń qazaq kúresinen irikteý jarysy ótti. Bul týraly Sporttyq jekpe-jek jáne kúsh qoldanylatyn sport túrleri konfederasııasynyń baspasóz qyzmeti habarlady.
Jarysqa 10 komandadan 121 qazaq kúresiniń sheberi qatysty. Komandalyq jarysta sportshylar boz kilemde 8 salmaq dárejesi, ıaǵnı 55 kg, 60 kg, 66 kg, 74 kg, 82 kg, 90 kg, 100 kg, +100 kg salmaqtarda beldesti. Nátıjesinde, tórt toptan úzdikter irktelip, ár toptyń jeńimpazdary anyqtaldy.
Osylaısha bıylǵy qazaq kúresinen konfederasııa kýbogynyń jartylaı fınaldyq kezeńine tórt komanda joldama jeńip aldy. Olar: «A» toby - «Elorda batyry» SK (Astana q) «B» toby - «Qazaq kuresi» SK (Almaty q) «S» toby - «Qaraǵandy oblysy qazaq kúresi» SK (Qaraǵandy oblysy) «D» toby - «ZAK KAR» qazaq kúresi SK (Qaraǵandy oblysy).
Esterińizge sala ketsek, alǵashqy jyly bes sport túrinen ótken bedeldi básekeniń baǵdarlamasyna 2017 jyly ulttyq kúres engizilgen bolatyn. Irikteýge segiz aımaqtan on klýb qatysyp, Almatynyń «Qazaq kuresi» sport klýby jeńimpaz atanǵan edi. Konfederasııa Kýbogy - barlyq 14 oblys pen respýblıkalyq mańyzy bar 3 qalanyń komandalary arasynda boks, grek-rım, erkin kúres, qazaq kúresi, dzıýdo jáne taekvondodan ótetin respýblıkalyq mańyzy bar týrnır. Bul saıystyń ereksheligi sol, sporttyń barlyq túrlerinen bolatyn fınaldyq oıyndardy kórermender bir mezette tamashalaı alady.
Týrnır bıyl úshinshi márte jalaýyn kóterip otyr. Konfederasııa Kýbogy 2016 jyldan bastap ótkizilip keledi.
Arnur ASQAR,
«Egemen Qazaqstan»