Qazaqstandyq gımnastshy Narıman Kýrbanov at snarıadynda úshinshi orynmen álem chempıonatynyń fınalyna shyqty dep habarlaıdy Olympic.kz.
Jeke jattyǵýlardyń fınaldaryna úzdik segiz sportshydan shyǵady. Irikteý saıysynda 202 sportshy baqtaryn synap kórdi.
Álem chempıonatynyń alǵashqy jarys kúninde óner kórsetken Narıman Kýrbanov at snarıadyndaǵy jattyǵýy úshin 14.466 upaı enshilep, birinshi kúnniń qorytyndysy boıynsha kósh bastaǵan edi. Irikteý kezeńiniń ekinshi kúninde de Narıman uzaq ýaqyt birinshi orynda kele jatty. Tek jarys kúniniń sońynda ǵana osy snarıadta eki dúrkin Olımpıada chempıony, 2017 jylǵy álem chempıonatynyń jeńimpazy atanǵan brıtandyq Maks Ýıtlok (14.966) pen 2017 jylǵy álem chempıony, osy jylǵy Azııa oıyndarynda top jarǵan qytaılyq Sıao Jotendi (14.633) alǵa jiberip qoıdy.
«Irikteýde at snarıadynda eki dúrkin Olımpıada chempıony, álem chempıony jáne kópsaıys boıynsha álem chempıonynan keıin úshinshi oryn alǵanyma óte qýanyshtymyn. Dene qyzdyryp jatqan kezde qatty qobaljý boldy. Biraq snarıadqa kelip, óner kórsetken kezde qobaljý basylyp, óz kombınasııamdy jasap shyqty. Minsiz oryndadym dep aıta almaımyn. Degenmen, fınalǵa shyqtym», deıdi Narıman Kýrbanov.
Aıta keteıik, ótken jylǵy Monrealdaǵy álem chempıonatynda Narıman at snarıadynda jańa kúrdeli elementti oryndaǵannan keıin Halyqaralyq gımnastıka federasııasy oǵan sportshynyń esimin berip, The Kurbanov dep ataǵan edi. Sol kezde Narıman Kýrbanov at snarıadynyń irikteý synynda 54-shi oryn alǵan edi.
«Men óz kombınasııamda ózimniń atymmen atalǵan elementti mindetti túrde jasaımyn. Biraq, jarysqa shyǵar aldynda bir elementti alyp tastadym. Durys sheshim boldy dep oılaımyn. Osy álem chempıonatynda eshkim meniń elementimdi qaıtalaı almady. Biraq jattyǵý kezinde sportshylardyń jasap júrgen beınerolıkterdi kórdim», deıdi qazaqstandyq sportshy.
Osy chempıonatta el namysyn Narımanmen birge Mılad Karımı, Erbol Jantyqov, Ilııas Ázızov pen Ákim Musaev qorǵap jatyr. Jalpy bizdiń gımnastshylarymyz 239.291 upaı jınap, irikteýden keıin úzdik jıyrma quramanyń qataryna ilikti. Bizdiń komanda 46 quramanyń ishinde 16-shy orynda.
«Meniń maqsatym ulttyq quramaǵa úzdik jıyrma tórt komandanyń ishine kirý jáne jekeleı synda fınalda shyǵý boldy. Árıne, irikteýden sátti ótkennen keıin medalǵa talasyp kórem. Eń bastysy fınalda qobaljymaı óner kórsetýim kerek», dedi sportshy.
Narıman Kýrbanovtyń fınaly qarashanyń 2-de ótedi. Erteń Qazaqstannyń áıelder quramasy jarys jolyna shyǵady. Elimizdiń atynan Aıda Baýyrjanova men Ekaterınoı Chýıkına óner kórsetedi. Sporttyq gımnastıkadan Dohada ótip jatqan álem chempıonaty qarashanyń 3-i kúni aıaqtalady.