Erlik eshqashan umytylmaıdy. Urpaqtar sanasynda estelik bolyp jańǵyryp tura beredi. Búgin qala kúni merekesi aıasynda «Jeńis» saıabaǵynda tarıhı erlik dáripteldi.
Atap aıtsaq, Aýǵan soǵysy ardagerlerine arnalǵan eskertkish ashylyp, kópshilik osy bir ıgi bastamaǵa kýá boldy. Eskertkishtiń ashylý saltanatyna Halyq qaharmany, Aýǵan soǵysynyń ardageri, Parlament Májilisiniń depýtaty Baqytjan Ertaev pen Aýǵan soǵysynyń ardageri, Parlament Májilisiniń depýtaty, «Qazaqstan ardagerleri» qaýymdastyǵynyń tóraǵasy Baqytbek Smaǵul arnaıy qatysyp, nysannyń lentasyn qıdy. Budan keıin sóz alyp, ótken kúnniń orny tolmas ókinishin shejireledi. Kezinde Aýǵanstan jerindegi áskerı is-qımyldarǵa Jambyl oblysynan 2236 jaýynger qatysyp, áskerı qaqtyǵystar kezinde 71 jas azamattyń qaza tapqanyn, bul árqashan orny tolmas ókinish ekenin jetkizdi.
Sonymen qatar, búgin «Jeńis» saıabaǵynda Chernobyl atom elektr stansııasyndaǵy apatty zalalsyzdandyrýǵa qatysýshylarǵa arnalǵan eskertkish ashyldy. Saltanatty sharaǵa Qazaqstan Respýblıkasy Chernobyl ardagerleri jáne múgedekteri qoǵamdyq birlestikteriniń úılestirý keńesi fılıalynyń tóraǵasy Baqytjan Áshirbaev pen Jambyl oblystyq Chernobyl odaǵy qoǵamdyq birlestiginiń múshesi Vladımır Horoshın qatysty. Aıta keteıik, bıyl Chernobyl atom elektr stansııasyndaǵy apattyń oryn alǵanyna 32 jyl. Ǵalamdyq iri jarylystyń zardabyn joıýǵa 800 myńdaı adam qatysqan. Onyń ishinde 32 azamat qazaqstandyq bolsa, 1200 adam Jambyl oblysynan edi.
Keshegi er etigimen qan keship, at aýyzdyǵymen sý ishken almaǵaıyp soǵys kezinde Jeńis kúnin jaqyndatýǵa tyl eńbekkerleri de atsalysty. Kún demeı, tún demeı maıdan dalasyndaǵy erlerge eńbegimen rýh bergen eńbek ardagerlerine arnalyp búgin «Jeńis» saıabaǵynan eskertkish ashyldy. Tyl eńbekkerlerine arnalǵan eskertkishtiń ashylý saltanatynda Jánibek Maıqanov jáne Raısa Jandosova syndy tyl ardagerleri kóz alyp, olardyń eńbektegi erlik jolyna toqtaldy. Budan keıin ardagerler eskertkishtiń lentasyn qıyp, eskertkishke gúl shoqtaryn qoıdy.
Hamıt ESAMAN,
«Egemen Qazaqstan»
Jambyl oblysy