El mádenıetine, jalpy óner ataýlyǵa ónerdiń óz adamyndaı dál baǵa beretin jan joq shyǵar, sirá. Kirbiń shalmaǵan, bylǵanbaǵan naǵyz óner ǵana memleket mádenıetiniń mereıin tasytyp, eldiń de abyroıyn asqaqtata túsetini anyq. Saf ónerdi qarabaıyrlyq deńgeıge deıin tómendetip, óner ókilderiniń kúnkóristiń emes, ashkózdiktiń «obektisine» aınalýy mártebeli mádenıettiń qunyn túsiretini taǵy málim.
Endeshe, kóńil túkpirine qonaqtaǵan qoıyn kitapshadaǵy keıbir pikirlerdi oqyrman nazaryna qaıta usynyp otyrǵan jaıymyz bar. Mynaý orys rejısseri Borıs Pokrovskııdiń aıtqany: «Egerde ónerimiz asqaq bolmasa, onda órkenıetti el de bolmaıdy. Tól mádenıetimizsiz eshqandaı ekonomıka da, eshqandaı saıasat ta eńsemizdi kóterýge kómektese almaıdy». Ult mádenıetin ulyqtaı bilý dep uqtyq rejısserdiń munysyn. Shynynda da ulyq óner ǵana ulttyń rýhyn asqaqtatyp, mártebesin bıiktetedi emes pe. Qajet deseńiz adal eńbek etip, nápaqasyn aıyrýǵa da, halyqtyń qazynasyna qol suqpaı, adal ómir súrý daǵdysyn qalyptastyrýda da mártebeli mádenıettiń yqpaly aıryqsha bolary sózsiz.
Adal eńbek demekshi, ataqty grýzın akteri Vahtang Kıkabıdze bul jóninde búı deıdi: «Erteń úrim-butaǵyń seniń esimińdi alyp-júrýden, seniń áýletińnen ekenin aıtýdan uıalmaıtyndaı ómir súrý kerek». О́mirlik kredosy osy óner adamynyń. Qudaı-aý, Kıkabıdzeniń osy aıtqany kerenaý keńselerde mamyq kreslolarda jantaıǵan jandar kompıýterin ashqan sátte nemese uıaly telefondarynan sát saıyn jyltyldap shyǵyp tursa, uıaty oıanar ma edi, kim bilsin!?. Naǵyz jumaq urlyq bolmaǵan qoǵamda ornaıdy emes pe?
«Qarapaıymdylyq qana halqyńmen jaqyndastyra túsedi. Pıar sabyn sý sııaqty, paıda bolyp, jyldam joǵalyp ketedi. Al adam boıyndaǵy asyl qasıetterdi eshqandaı aqshaǵa satyp ala almaısyz». Jarty ǵasyrǵa jýyq tyńdarmanyn tamasha ánderimen terbep, qarapaıymdylyǵynyń arqasynda halqynyń qurmetine bólengen «Iаlla» ansambliniń jetekshisi Farýh Zakırovtiń aıtqanyn beker deı almassyz.
Úshtaǵan pikirdiń sóz túsinetin kisige aıtar taǵylymy az emes. B.Pokrovskıı mádenıetsiz memlekettiń kósegesi kógermeıtinin sóz etip, V.Kıkabıdze óner adamynyń adal bolýyn aıtsa, F.Zakırov oǵan qarapaıymdylyq syndy asyl qasıetti qosady. Qazaq mádenıetiniń óris ólshemin osy úshtaǵan deńgeıine salsaq qalaı bolar eken?!
Ǵabıt ISKENDERULY,
«Egemen Qazaqstan»