Túrkııanyń Táýelsizdik kúnine oraı Túrkitildes jýrnalıster qorynyń uıymdastyrýymen Túrkııanyń Qazaqstandaǵy Bas konsýly Ryza Qaǵan Iylmaz qazaq jýrnalıstermen kezdesip, eki el arasyndaǵy yntymaqtastyq baılanystar tóńireginde pikirlesti.
Búginde baýyrlas elder – Qazaqstan men Túrkııa arasynda tarıhı-mádenı baılanystarmen qatar ekonomıka salasyndaǵy áriptestiktiń tarıhy tereńge ketedi. BAQ ókilderimen kezdesýde Bas Konsýl baılanystary túrki áleminiń qoınaýyna ketetin, rýhy men tarıhy týys elderdiń saıası-ekonomıkalyq, dıplomatııalyq, tarıhı jáne rýhanı máseleler jaıly keńinen maǵlumat berdi. Ryza Qaǵan Iylmaz aıtýynsha, Qazaqstan prezıdenti Nursultan Nazarbaev pen Túrkııa prezıdenti Redjep Taııp Erdoǵannyń bastamasymen, eki el arasyndaǵy saýda aınalymyn jýyq arada 10 mıllıard dollarǵa jetkizý maqsat etilgen. Ejelgi Jibek jolyn jańǵyrtý maqsatynda qolǵa alynǵan «Zamanaýı Jibek joly» jobasy men jýyrda ǵana iske qosylǵan Baký-Tbılısı-Kars temirjol toraby baýyrlas elder arasyndaǵy ekonomıkalyq baılanystardy nyǵaıta túseri anyq. Búginde qazaq jáne túrik ınvestorlary munaı, mal sharýashylyǵy, azyq-túlik, farmasevtıka men ekonomıkanyń basqa da salalarda óte belsendi. Túbi bir túrki elderi saıası, mədenı, rýhanı baǵyttaǵy baılanystaryn Túrki Keńesi, TÚRKSOI, Túrki Akademııasy halyqaralyq uıymdar sheńberinde damytyp keledi. Irak, Sırııa sııaqty soǵys órti órshigen aımaqtarda beıbitshilik pen turaqtylyqty qamtamasyz etýde de Qazaqstan men Túrkııanyń múddesi ortaq.
Bas konsýl Ryza Qaǵan Iylmaz myrza Túrkııanyń qaıyrymdylyq sharalaryna basa nazar aýdaratynyn aıtty. Məselen, túrikter Jer sharyndaǵy kómekke muqtaj aımaqtaryna 8 mıllıard dollarǵa jýyq qarajat bólgen, soǵys bolyp jatqan elderdiń azamattaryn shekaradan kedergisiz ótkizip, azyq-túlik, baspanamen qamtamasyz etken. Búginde Túrkııada júrgen sırııalyqtardyń sany 4 mln asady. Túrkııanyń adam quqyqtaryn qorǵaý men gýmanıtarlyq kómek kórsetý jobalary jaıly da keńinen málimetter berdi. Búginde Túrkııa jer sharyndaǵy beıbit ómirdiń ornyqtylyǵyn qalaıdy ári Qazaqstanmen rýhanı-mádenı áriptes retinde beıbitshilik mıssııasynda ortaq qadamdar ustanady.
«Sırııadaǵy qantógisti toqtatýda Túrkııa men Qazaqstan birlese áreket etip keledi. 2016 jyly 15 shildede Túrkııada áskerı tóńkeris jasaýǵa áreket etken fetýllahshylardyń qylmysynan keıin Túrkııaǵa eń birinshi bolyp resmı saparmen Qazaqstan Prezıdenti Nursultan Nazarbaevtyń kelýi kezdeısoqtyq emes.Bul baýyrlas el – Túrkııaǵa degen qoldaý» dep atap ótti Bas konsýl.
Elvıra SERIKQYZY,
«Egemen Qazaqstan»
ALMATY