Búgin Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynyń barysynda ádilet mınıstri Marat Beketaev 2019 jylǵa arnalǵan zań jobalaý jumystarynyń jospary týraly baıandady.
Ádilet mınıstrligi Zań jobalaý qyzmeti máseleleri jónindegi Vedomstvoaralyq komıssııa múshelerimen birlesip Úkimettiń 2019 jylǵa arnalǵan jumys josparyn ázirledi. Onyń negizine el Prezıdenti aıqyndaǵan, memlekettiń strategııalyq qujattarynda baıandalǵan mindetter alyndy.
Marat Beketaev aldaǵy jyly «Halyqtyń densaýlyǵy jáne densaýlyq saqtaý júıesi týraly», «Qazaqstan Respýblıkasynyń Ekologııalyq kodeksi» kodeksterdiń jańa jobalary, sondaı-aq «Pedagogtyń mártebesi týraly», «Memlekettik feldegerlik baılanys týraly» zań jobalaryn ázirleý kózdelip otyrǵanyn jetkizdi. Sonymen qatar memlekettik organdar quqyqtyq monıtorıng nátıjeleriniń negizinde birqatar zań jobalaryn ázirleýdi josparlap otyr.
Jalpy Jospar jobasy 29 zań jobasyn ázirleýdi qarastyrady. M. Beketaev Jospar jobasyn qalyptastyrý kezinde zań jobalaryn jyl ishinde Parlamenttiń qaraýyna josparly engizý qajettiligi eskerilgenin aıtty. Máselen, 2019 jyldyń I jarty jyldyǵynda Parlamentke 16, al II jarty jyldyqta 13 zań jobasyn engizý josparlanýda.
«Zań jobalardyń eń kóp sanyn ázirleý Energetıka mınıstrligine tıesili, bul 5 zań jobasy. Ulttyq ekonomıka jáne Qarjy mınıstrlikteri 3 zań jobasyn ázirleıdi. Ishki ister, densaýlyq saqtaý, aýyl sharýashylyǵy, mádenıet jáne sport, bilim jáne ǵylym, eńbek jáne halyqty áleýmettik qorǵaý mınıstrlikteri 2 zań jobasynan ázirleıtin bolady», — dedi M. Beketaev.
Qorǵanys, qoǵamdyq damý, qorǵanys jáne aeroǵarysh ónerkásibi, ınvestısııalar jáne damý, sondaı-aq Bas prokýratýra, Memlekettik qyzmet isteri jáne sybaılas jemqorlyqpen kúres agenttigi bir-bir zań jobasynan ázirleıtin bolady.
«Jospardyń jobasy Zań jobalaý qyzmeti máseleleri jónindegi Vedomstvoaralyq komıssııanyń otyrysynda talqylandy. Úkimettik emes uıymdardyń usynystary eskerildi. Josparda kózdelgen zań jobalary boıynsha túsindirý jumystaryn ony qabyldaǵannan keıin memlekettik organdar júrgizetin bolady», — dedi mınıstr.