Túrkistan qalasyna kelýshiler sany 1 mln. adamǵa jetip, ótken jyldyń dál osy kezimen salystyrǵanda 57,2 paıyzǵa artyp otyr.
Búginde týrızmdi damytý baǵytynda óńirde júıeli baǵdarlamalar daıarlanǵan. Iаǵnı aldaǵy ýaqytta kelýshiler sany taǵy arta túsetinine senim mol.
Al seısenbi kúni mıllıonynshy bolyp tirkelgen qonaq AQSh-tyń Soltústik Korolına shtatynan kelipti. Erli-zaıypty Ýılıam jáne Barbara Brenchterdi Túrkistan oblysynyń ákimi Janseıit Túımebaev Iаsaýı kesenesi aldynda kútip aldy. Qazaqstanǵa alǵash kelip otyrǵan Ýılıam Brench amerıkalyqtar Túrkistandy Orta Azııa memleketteri ishindegi tarıhy baı, kıeli mekenderdiń biri retinde tanıtynyn aıtady. AQSh azamattarynyń qasıetti qalaǵa jıi kelýi de sondyqtan. «Biz Túrkistan qalasy men Iаsaýıdiń tarıhynan habardarmyz. Qazaqstanǵa, Túrkistan óńirine kelgeli qazaq halqynyń qonaqjaılyǵy men darqandyǵyna kýá boldyq. AQSh-qa barǵannan keıin ondaǵy otandastarymyzǵa osy qundylyqtaryńyzdy jetkizip, kelesi jyly arnaıy taǵy at basyn buramyz», - dedi Ýılıam Brench.
Oblys ákimi Túrkistanǵa kelgen mıllıonynshy qonaqtarǵa ulttyq shapan kıgizip, qamshy, taıqazan syılady. Sondaı-aq, Túrkistan óńirinde týrızm áleýetin arttyrý úshin artqarylyp jatqan jumystarmen tanystyrdy.
Ǵalymjan ELShIBAI,
«Egemen Qazaqstan»
Túrkistan oblysy