Bıyldan bastap Nazarbaev ýnıversıtetiniń magıstranttaryn «Qazsınk» kompanııasynyń bólimshelerinde tájirıbeden ótkizý maqsatynda arnaıy baǵdarlama jumysyn bastady. Baǵdarlama aıasynda atalǵan oqý ornynyń 20 stýdenti Kókshetaý, Rıdder jáne Zyrıan qalalaryna kelip, taý-ken óndirisimen jete tanysyp, bilimderin jetildirip qaıtty.
Nazarbaev ýnıversıteti elimizdegi beldi, bedeldi ýnıversıtetterdiń birinen sanalady. Joǵary oqý ornynyń stýdentteri álemniń úzdik ýnıversıtetteri men ortalyqtarynda aǵylshyn tilinde bilimderin shyńdaıdy. «Kazzinc Holdings» JShS dırektorlar keńesiniń tóraǵasy Nıkola Popovıch Nazarbaev ýnıversıtetiniń taý-ken isi jáne Jer týraly ǵylymdar mektebi janyndaǵy ındýstrııalyq keńestiń múshesi bolyp tabylady.
«Búginde kóptegen kásiporyndar bilikti mamandarǵa zárý. Bul máselege demografııalyq jaǵdaıdyń da áserin joqqa shyǵarýǵa bolmaıdy. Bizdiń kásiporyndarda jasy ulǵaıǵan, aqyl toqtatqan, jumys tájirıbesi mol, óz kásibiniń maıtalmany deýge turarlyq mamandar jumys isteıdi. Biraq olar sıfrlyq tehnologııalardan beıhabar. Al jas mamandarǵa tájirıbe men bilim jetispeı jatady, - deıdi Nıkola Popovıch.
Memleket basshysy qazan aıyndaǵy Joldaýynda elimizdiń bilim salasy jańartýdy qajet etetindigine toqtalyp, bilim sapasyn kóterip, túlekterdiń jumysqa ornalasýyna kóńil bólý kerektigin erekshe atap ótken edi.
«Prezıdent bilim salasyndaǵy túıtkildi máselelerdi aıtyp qana qoımaı, odan shyǵýdyń joldaryn da kórsetti. Joldaý tutastaı alǵanda bizdiń kompanııaǵa, onyń árbir qyzmetkerine qatysty deýge bolady. Jumys berýshi retinde Memleket basshysynyń joǵary oqý oryndaryndaǵy bilim sapasyn kóterý týraly ustanymyn tolyǵymen quptaımyz. О́z jumysyna jetik, kásibı mamandardy ázirleý – iri kompanııalar úshin de, ýnıversıtet úshin de asa mańyzdy. Jastar tehnıkalyq bilimdi kóbirek alýy úshin ózgerister qajet. Biz bul sharýaǵa belsene aralasyp, Nazarbaev ýnıversıtetimen yntymaqtastyq ornattyq. «Qazsınk» Prezıdent janyndaǵy sheteldik ınvestorlar keńesiniń oqý baǵdarlamalaryn ázirleý jáne jetildirý jónindegi komıssııasynyń quramyna enedi», - deıdi «Qazsınk» JShS ákimshilik máseleler jónindegi atqarýshy dırektory Andreı Lazarev.
Nazarbaev ýnıversıtetiniń «Taý-ken isi» baǵdarlamasynyń úılestirýshisi Danııar Malǵadjar «Qazsınkpen» yntymaqtastyq stýdentter úshin paıdaly ári jemisti bolǵanyn aıtady. «Sala kóshbasshylarmen birlese qolǵa alynǵan mundaı jobalar kenshi mamandarynyń mártebesin jańa beleske kóteredi. О́ıtkeni, bolashaq jas mamandarǵa zamanaýı óndiristi óz kózderimen kórýge múmkindik bar. Biz stýdentterge qyzmettik baspaldaqtaryn, alǵan bilimin qaıda jumsaıtyn naqty kórsetkimiz keledi. Ýnıversıtettiń stýdentteri tek tájirıbeden ótken joq, qalyptasqan úlken ujymnyń tynys-tirshiligimen de tanysty», - deıdi ol.
Joǵary oqý ornynyń ókilderin ásirese qazsınktikterdiń óz jumysyna degen qulshynysy tańǵaldyrypty. Bir jarym aı kólemindegi tájirıbe barysynda magıstranttar ustazdaryna baýyr basyp qalǵandaı. «Men Oral qalasynyń týmasymyn, Rıdderde birinshi ret boldym. Erekshe tánti etkeni, sulý tabıǵat pen meıirimdi adamdar.
Meni «Kazsınk-Shahtostroıdyń» marksheıder bóliminiń qyzmetkeri Anastasııa Kýznesovaǵa bekitti. Ol barlyǵyn muqııat túsindirip, suraqtaryma jaýap berdi. Shahtaǵa ózimen birge alyp túsip, marksheıder jumysynyń máni men mańyzyn, erekshelikterin jaqsylap túsindirdi. Mundaı ujymdy kórgenime óte qýanyshtymyn. Tájirıbemdi qyzyqty ótkizgen bólimge, ustazyma alǵysymdy bildirgim keledi», - deıdi baǵdarlama qatysýshysy Aıtolqyn Iаzıtova.
Azamat QASYM,
«Egemen Qazaqstan»
Shyǵys Qazaqstan oblysy