Belgili memleket jáne qoǵam qaıratkeri, Parlament Májilisiniń tóraǵasy bolǵan Oral Muhamedjanovtyń ómirden ozǵanyna bıyl 5 jyl boldy.
Jerlesteri uıymdastyrǵan eske alý sharalary aıasynda Rýdnyı qalasyndaǵy ol oqyǵan burynǵy mektep, qazirgi mýzyka kolledji ǵımaratynyń qabyrǵasyna eskertkish taqta ilindi. Onyń ashylýyna oblys jáne Rýdnyı qalasy basshylyǵynyń ókilderi, zamandas dostary qatysty.
– Qazaqstan Respýblıkasy Prezıdentiniń Ákimshiliginde jaýapty qyzmetter atqaryp, Parlament Májilisine depýtat, eki márte tóraǵa bolyp saılanýy Orekeńe artylǵan zor senim men jaýapkershiliktiń jeńil bolmaǵanyn ańǵartady. Kózi tiri bolsa ol búgin 70 jasqa tolar edi. «Jaqsynyń aty ólmeıdi, ǵalymnyń haty ólmeıdi» degendeı, Rýdnyı qalasynda ilingen eskertkish taqta Oral Baıǵonysulynyń eli úshin jasaǵan eńbegin umyttyrmaıdy, – dedi Qostanaı oblystyq máslıhatynyń hatshysy Saılaýbek Esjanov.
Oral Muhamedjanov jas táýelsiz eldiń zańnamalyq bazasyn nyǵaıtýǵa eńbek sińirdi. Elbasynyń senimdi serikteriniń biri boldy. О́ziniń bilimi men qajyr-qaıratyn Qazaqstannyń gúldenýine jumsady. Ol depýtat retinde Qostanaıǵa kelgen sapary saıyn týǵan jerdegi bilim ordalaryna baryp, stýdent jastarmen kezdesýge, olardy bolashaq bilikti maman bolýy úshin baǵyttaýǵa, pikirlesýge ýaqyt taba biletin.
Ádette, O.Muhamedjanovty eske alǵanda tekti áýlettiń tuıaǵy ekeni týraly áńgime qozǵalady. Bul sharada da jerlesteri onyń boıyndaǵy ónerge jaqyndyq atalarynan kelgen daryn ekenin aıtty.
– Oral aǵanyń atasy Muhamedjan О́telbaıuly Arqadaǵy ánshilik mektebiniń iri ókili bolǵan. Jasynda Troısk, Boqyraý, Qaraótkel, Atbasar jármeńkelerinde án salyp, óner jarystyrǵan. Onyń ózi shyǵarǵan segiz áni Talıǵa Bekhojınanyń «Qazaqtyń 200 áni» jınaǵynda jaryq kórgen. Al ákesi Baıǵonys atamyz Qostanaı-Torǵaı óńirine tanymal ánshi edi. Oral aǵa Novosibirde oqyp júrgende klassıkalyq ánder men operalyq arııalardy oryndap, ánshiligimen tanylǵan, – dedi mýzyka zertteýshisi Gúlnár Álpeıisova.
– Táýelsiz Qazaqstannyń quqyqtyq-zańnamalyq irgetasynyń nyǵaıýyna aıtarlyqtaı úles qosqan Oral Muhamedjanovtyń ómiri men qyzmeti jastarǵa úlgi. Jas urpaq týǵan eldiń jaqsylaryn umytpaýy kerek, sondyqtan búgingi eskertkish taqtanyń ashylýy osy ǵımaratta bilim alyp jatqan jastar jáne qalalyqtar úshin mańyzdy oqıǵa sanalady, – dedi Rýdnyı qalasy ákiminiń orynbasary Elena Skaredına. Eńbek ardageri Jumaǵalı Qasymov Oral Baıǵonysulynyń dostyqqa adal, adamgershiligi týraly áńgimeledi.
Oral Baıǵonysulynyń jary Sholpan men qyzy Zýhra eskertkish taqtanyń ashylýyna qatysyp, otbasy atynan jerlesterine rızalyǵyn bildirdi.
Názıra JÁRIMBET,
«Egemen Qazaqstan»
Qostanaı oblysy, Rýdnyı qalasy