Sońǵy ret Entonı Aıello ógeı qyzymen sóıleskende, ol Kalıfornııa shtatyndaǵy San-Hose qalasyndaǵy ógeı qyzynyń úıine pıssa men bıskottı apara jatqan bolatyn. 90 jastaǵy Aıello tergeýshilerge keıinnen qyzy ózin esikke deıin shyǵaryp salyp, alǵys retinde eki roza bergenin aıtty.
Krıstın HAÝSER, «Nıý-Iork Taıms»
Polısııa málimdemesine qaraǵanda, úıdegi baıqalmaıtyn baqylaýshy kezdesýdiń sońy adam ólimimen aıaqtalǵanyn kórsetken.
Bes kúnnen keıin Aıellonyń ógeı qyzy 67 jastaǵy Karen Navarranyń moıny men basyna aýyr jaraqat túsken denesin úı qyzmetshisi taýyp alǵan. Ol Fitbit kompanııasynyń dene jaǵdaıyn baqylaıtyn qurylǵysyn taǵyp alǵan eken. Tergeýshilerdiń aıtýynsha,
8 qyrkúıekte túski 3:20 shamasynda onyń júrek soǵysy atqaqtap ketkenin kórsetipti. Sol ýaqytta Aıello myrza úıde bolǵan. Keıinnen qurylǵy júrek soǵysy birden baıaýlap, 3:28-de birjola toqtaǵanyn tirkegen. Bul Aıellonyń úıden ketýinen 5 mınýt buryn bolatyn.
Keıinirek Aıello adam óltirgeni úshin tutqynǵa alyndy. Adamdardyń óz densaýlyǵyn baqylaýyna kómektesetin qurylǵy aqyrynda uıaly telefondar, GPS navıgatorlar, vıdeolar sekildi zań aıasynda qylmysty ashýǵa qoldanylatyn tehnologııalardyń qatarynan tabyldy.
Denege tańylǵan mundaı qurylǵy adam ómiri úshin asa mańyzdy. Júrek soǵysy, uıqy jáne fızıkalyq qozǵalystyń bárin tirkeıtin apparat kenet kezdesetin qıyn jáne qalypty oqıǵalardyń bárin tirkep otyrady.
Fitbit-tiń jınaǵan derekteri
2015 jyly Pensılvanııa shtatyndaǵy zorlaý oqıǵasyn, 2014 jyly Kanadada dene jaraqatyn salý sátin anyqtaýǵa kómektesti. 2017 jyly Sıetl shtatynda Garmin Vivosmart kompanııasynyń GPS navıgatory áıel men buzaqynyń oqıǵasyn tirkedi. Sol jyly Konnektıkýtta tergeýshiler áıelin óltirgen er adamdy Fitbit qurylǵysy arqyly ustady.
«Esiktegi qaýipsizdik qońyraýy men Fitbit sekildi ómirdegi keıbir máselelerge kómekshi quraldar asa qaýipti qylmystardyń betin ashýǵa kómektesedi», deıdi Kalıfornııa shtatyndaǵy Santa Klara okrýginiń aýdandyq advokaty Djeff Rosen.
Polısııanyń aıtýynsha, San Hosedegi oqıǵada olar tergeý barysynda beınebaqylaý men Navarra hanymnyń Fitbit qurylǵysyndaǵy derekterdi paıdalanǵan. Jalǵyz turatyn onyń bilezigine taǵylǵan apparat derekterdi úıindegi kompıýterge júktegen.
Polısııa Navarra hanymnyń Fitbit derekterin beınebaqylaýmen salystyrǵanda, onyń júregi toqtaǵan ýaqytta Aıellonyń kóligi áli de úıdiń qasynda turǵanyn anyqtady.
Polısııa detektıvi Braıan Mıkerdiń aıtýynsha, Aıellodan jaýap alý kezinde oǵan qarsy málimetter aıtyldy. «Fitbit-tiń ýaqytty, fızıkalyq qozǵalysty jáne júrek soǵysyn tirkeý qabileti týraly túsindirilgennen keıin, Navarra hanymnyń ol úıden ketpes buryn qaıtys bolǵany týraly aıtyldy», delingen detektıv Mıkerdiń baıandamasynda.
Aıello onyń múmkin emes ekenin, Navarra hanymnyń esikke deıin shyǵaryp salǵanyn aıtyp ózeýredi.
«Men oǵan eki júıede de ınternet ýaqyty qoıylǵanyn jáne qatelesýi múmkin emes ekenin túsindirdim», deıdi detektıv Mıker.
Budan soń detektıvter Aıellony tergeý bólmesine jalǵyz qaldyryp ketedi. Polısııa baıandamasyna súıensek, sodan keıin ol «Bári bitti», degendi qaıtalaı bergen.
Maqalalardy aýdarǵan
Abaı ASANKELDIULY,
Svetlana Ǵalymjanqyzy,
«Egemen Qazaqstan»