Almatyda alǵashqy týrıstik hab ashyldy. Týrızmdi tabys kózine aınaldyrýda áleýeti eń joǵary megapolıstiń týrıstik ortalyǵy Balýan Sholaq atyndaǵy sport saraıyna ornalasty. Tusaýy kesilgen ortalyqtan 7 túrli baǵytta, ulttyq naqyshtarmen áspettelgen tanym aımaqtaryn tabýǵa bolady.
Bıylǵy jyldyń ekinshi toqsanynda Almatyǵa kelgen týrıster sany 503 myńǵa jetti. Bul byltyrǵymen salystyrǵanda 7% artyq. Ásirese Reseıden keletin týrıster sany basym, bul kórsetkish 102 myńǵa jetti. Keıingi oryndarda Qytaı (32 000) men О́zbekstan (24 000) tur. Sondaı-aq Túrkııa men Úndistannan kelip jatqan týrıster legi bar.
Al Visit Almaty týrıstik aqparattyq ortalyǵynyń dırektory Edige Marǵulannyń aıtýynsha, hab ishki týrızm túrlerin meılinshe sapaly deńgeıge kóterýge múmkindik beredi, týrıster aǵylyp keletin ortalyqty quryp, óńirdiń tartymdylyǵyn arttyrady, búkil álemge tanymal bolatyn mádenı kodty qalyptastyrmaq.
Sonymen qaladaǵy ámbebap týrıstik hab týrısterge shahardyń kórikti jerleri jaıly tolyqqandy aqparat bere alady ári týrısterdiń qataryn tolyqtyra túsetin qala qonaqtary men turǵyndaryna qoljetimdi baǵyttar týraly jol siltep, estelik kádesyılar satyp alý men demalysty oıdaǵydaı ótkizýge múmkindigin beredi. Hab qalanyń qaq ortasynda, toǵyz joldyń torabynda ornalasqan, oǵan megapolıstiń kez kelgen jerinen op-ońaı jetýge bolady.
Almatydaǵy alǵashqy týrıstik hab ashylmaı turyp, oǵan qala ákimi Baýyrjan Baıbek kelip, ortalyqtyń jaı-japsarymen tanysty.
О́z kezeginde Almaty qalalyq Týrızm jáne syrtqy baılanystar basqarmasynyń basshysy Maqsat Kıkımov aldaǵy jyly alǵash ret 2023 jylǵa deıingi týrızmdi damytý jónindegi memlekettik baǵdarlama ázirlenetindigin aıta kele: «Baǵdarlamanyń negizgi maqsaty – týrızmniń IJО́-degi úlesin 8 paıyzǵa deıin jetkizý. Búginde bul kórsetkish Almatyda 1,5 paıyzdy quraıdy. Almaty qalasy ákiminiń bastamasymen qurylǵan týrıstik hab memlekettik baǵdarlamadaǵy maqsattarǵa qol jetkizýge jaǵdaı jasaıdy», deıdi.
Týrıstik habtyń saltanatty ashylý rásiminde qolónershilerdiń «Qazaq óneri» ortalyǵy ulttyq materıaldardan ázirlengen kádesyılardy kórsetti. Al týrıstik agenttikter Almatynyń kórikti oryndaryna saıahattaýǵa arnalǵan ekskýrsııalar men eksklıýzıvti týrlardy usyndy.
Aınash ESALI,
«Egemen Qazaqstan»
ALMATY