«Sýly jer – nýly jer» dep halqymyz beker aıtpasa kerek. Kezinde Batys Qazaqstan oblysynyń Jańaqala aýdanynda 80 kól bolǵan desedi qarııalar. Onyń keıingi kezde jeti-segizin ózimiz de kórdik. Keıin qos ózennen keletin sý saıabyrsyp, ýaqyt óte kele sýdyń ózi de taýarǵa aınalyp, qarjyǵa tirelip qaldy.
«Kisideginiń kilti aspanda» degendeı, Reseı tarapy sońǵy jyldary óz jerinen toǵan sanyn kóbeıtip jiberdi. Tipti bastaýyn sol jaqtan alatyn qos ózen sarqylyp, aıaqtaǵy el sýdan taryǵyp qalatyn kezi de jıi kezdesti. Adamdar sýdy ashyq ózenderden ishýge májbúr boldy. Taza sý – densaýlyq kepili eken. Ashyq-shashyq sý ishken el ishinde ártúrli aýrý kóbeıe bastady.
Jańaqalada taza sý máselesi 2012 jyldan aıtyla bastady. Arnaıy zertteý oryndary Qulshyq eldi mekeninde mol jerasty sý qory bar ekenin anyqtady.
Elbasy N.Á.Nazarbaev «Qazaqstan-2050» Strategııasynda keleshektegi elge túser náýbet – aýyz sý jetispeýshiligi bolatynyn kóregendikpen atap kórsetip, Úkimetke ony sheshý joldaryn qazirden bastap qolǵa alý kerektigi jóninde naqty tapsyrma bergen bolatyn. Prezıdenttiń aýyz sý máselesin sheshý týraly naqty tapsyrmasy alystaǵy aýyl turǵyndarynyń keýdesine úmit otyn jaqty. Turǵyndardyń erteńine senim paıda bolǵannan keıin Qulshyq eldi mekeninen sý tartý jóninde aýdan azamattarynyń atynan Parlamentke birneshe márte hat joldandy.
Elbasy tapsyrmasyna oraı óńirimizge kelgen Premer-Mınıstr oblysymyzdyń ońtústik aımaǵyndaǵy jartylaı shóleıtti óńirge ornalasqan Jańaqala aýdany turǵyndarynyń aýyz sýǵa muqtajdyǵyn muqııat eskerip, nátıjeli sharalar qabyldaǵan edi.
Mine, Úkimetten bólingen 2 mıllıard teńgege jýyq qarjyny merdiger tııanaqty ıgerip, jumysty bıyl qyrkúıek aıynda merziminen buryn aıaqtap shyqty. Osylaısha Elbasymyzdyń halyqqa degen qamqorlyǵy naqty kórinis tapty!
Nátıjesinde 143 shaqyrymdyq toptyq sý qubyry tabıǵattyń qolaısyz shaqtaryna qaramastan qarqyndy júrgizilip, Jańaqala aýdanynyń 10 aýyly men eldi mekeni taza aýyz sýmen qamtamasyz etildi. Elbasyna halyqtyń rızashylyǵy sheksiz. Sebebi Jańaqala gazben qamtylǵan, joly jóndelgen aýdan bolatyn. Taza aýyz sý ár úıge qubyrmen kirip kelgende qala men aýyldyń aıyrmashylyǵy bolmaı qaldy. Memleket basshysynyń ózi qalalyqtar men aýyldyqtardyń ómir súrý deńgeıiniń arasyndaǵy teńsizdikti joıý jóninde tapsyrdy emes pe? Mine, bul oryndaldy.
Jańaqala toptyq sý qubyrynyń ashylý saltanatynda óńir turǵyndary atynan sóılegen toqsannyń tórine shyqqan abyz aqsaqal B.Saparov, zeınetker-ustaz R.Kenjekeevalar Elbasymyzǵa, Úkimetke rızashylyqtaryn bildirip, sheksiz alǵys aıtty. Bul jańaqalalyqtardyń shynaıy kóńili edi.
Zakarııa SISENǴALI,
Jańaqala aýdandyq máslıhatynyń hatshysy
Batys Qazaqstan oblysy