Aıtýly báseke dańqty balýan, abzal azamat, KSRO sport sheberi Ýálıhan Nurkeevtyń qurmetine arnaldy.
Týrnırdiń ashylý saltanatynda týrızm jáne sport basqarmasynyń basshysy Rýslan Esenalın, oblystyń qurmetti azamaty Jambyl Tasemenov, jan jary Baǵıla Tólentaıqyzy, taǵy basqalary sóılep, marqumnyń jaqsy qasıetterin eske aldy. Ol óńirde sporttyń, onyń ishinde kurestiń damýyna úlken eńbek sińirdi. Talaı baıraqty básekelerde top jardy. «Spartak» erikti sport qoǵamyna jetekshilik etti. «Jiger» sport klýbyn qurýǵa tikeleı atsalysty. Onyń jolyn qýǵan shákirtteri ustaz atyna kir keltirmedi. Tiri bolsa, jetpis jasyn toılap, tórde tóbe bı bolyp otyrar edi.
Qyrǵyzstannan, Reseıden jáne Qazaqstannyń ár qıyrynan jınalǵan eki júzge jýyq grek-rım kúresiniń balǵyn balýandary boz kilemde jasyndaı jarqyldap, eń myqtylary jeńimpaz atandy. Jastarynyń kishiligine qaramastan nebir aıla-tásilderdi qoldanyp, sheberlikterin kórsete bildi.
«Ýálıhan sekildi marqasqa azamatty eske alý týrnıri 2011 jyldan beri turaqty túrde ótkizilip keledi. Reseıdiń Sýrgýt, Petýhovo qalalarynan komandalar jylda qatysady», deıdi jarystyń bas tóreshisi Meıram Hamzın.
26 kılo salmaqta beldesken Novosibir qalasynyń ókili Mıhaıl Oprısh aqtyq saıysqa deıin alqynbaı jetkenimen, onyń jolyn Qyrǵyzstannyń jas qyrany Ádilet Asanqulov bógedi. 29 kılo salmaqta túrkistandyq Erasyl Musa jeńistiń eń bıik tuǵyryna kóterildi. Reseılikter 4 altyn júldeni qanjyǵaǵa baılady.
Barlyq qatysýshylarǵa marapat dıplomdary, eskertkish syılyqtar jáne Ý. Nurkeevtiń beınesi salynǵan tósbelgiler tartý etildi.
О́mir ESQALI,
«Egemen Qazaqstan»
Soltústik Qazaqstan oblysy