Bul kúnderi Reseıdiń Hanty-Mansıısk qalasynda shahmattan áıelder arasyndaǵy álem chempıonaty ótýde. Bul jarysta 28 memleketten kelgen 64 oıynshylar baq synaýda.
Jer jahannyń eń úzdik shahmatshylary bas qosqan baıraqty báseke nokaýt júıesi boıynsha ótýde. Iаǵnı, jeńiske jetken úmitker kelesi kezeńge joldama alsa, jeńilgeni sol mezette jarysty aıaqtaıdy. Bul jarysqa Qazaqstannyń úsh sportshy attandy. Olar – Dınara Sádýaqasova, Jansaıa Ábdimálik jáne Gúlishan Naqbaeva. О́kinshike qaraı, Gúlishannyń Hanty-Mansııskide joly bolmady. Asa shıelenisti ótken básekede ol reseılik Alısa Gallıamovadan utylyp qalyp, kórermender qataryna qosyldy.
Al qalǵan eki qyzymyz alǵashqy synaqtan súrinbeı ótti. 22 jastaǵy Dınara Sádýaqasova Ispanııanyń týy astynda kórsetip júrgen 35 jastaǵy grýzııalyq shahmatshy Ana Matnadzeni ádemi utty. Esep – 2:0. 18 jasar Jansaıa 24 jastaǵy Úndistannyń ókili Padmını Roýttan basym tústi. Esep – 1,5:0,5.
Qazirgi kezde ekinshi kezeńge joldama alǵan oıynshylar jarys kórigin qyzdyrýda. Dınara Bolgarııanyń betkeustary, kezindegi álem chempıony 39 jastaǵy Antoaneta Stefanovamen sheberlik baıqasýda. Jansaıanyń qarsylasy da óte myqty. Qazaq qyzy Qytaıdyń 33 jastaǵy saqa oıynshysy Chjao Sıýemen saıysqa túsýde. Olardyń ekeýiniń de qandastarymyzdan reıtıngi joǵary. Soǵan qaramastan Sádýaqasova men Ábdimálik ataqty shahmatshylarǵa laıyqty qarsylyq kórsetýde. Bul mejedegi alǵashqy partııalardyń ekeýi de teń aıaqtaldy.
Júlde qory 450 000 AQSh dolllaryn qurap otyrǵan aıtýly jarys 23 qarashada óz máresine jetip, jańa álem chempıonynyń esimi belgili bolady.
Ǵalym SÚLEIMEN,
«Egemen Qazaqstan»