Almatyda áıgili mánerlep syrǵanaýshy, Olımpıada oıyndarynyń júldegeri Denıs Tenniń qurmetine eskertkish taqta ornatyldy. Dańqty sportshynyń jarqyn beınesin aldyńa ákeletin taqta Denıs Tenniń kózi tirisinde turǵan úıiniń qabyrǵasynan oryn alǵan.
Eskertkish taqtanyń ashylý rásimine jarq etip sóngen jaýqazyn ǵumyrdyń óneri men dańqty jolyn aıryqsha baǵalaıtyn Almatylyqtar men belgili sportshylar jınaldy. Olardyń sapynda álemdik arenada top jarǵan talaı sportshylardyń tomaǵasyn sypyrǵan bapker Tatıana Tarasova men reseılik mánerlep syrǵanaýshy Elena Radıonova syndy tanymal tulǵalar boldy.
«Denıs Ten – uly adam. Onyń ónerin tamashalaǵan mıllıondaǵan adam kartadan Qazaqstandy izdedi. Denıs arqyly Qazaqstandy tanydy. Onymen jumys istegen men baqyttymyn. Ol balań jasynan ereksheligimen kózge túsken úzdik sportshy bolatyn», deıdi Tatıana Tarasova.
Nebary 25 jyl ǵumyr keshken Denıs Ten jahan sport tarıhynda óshpes iz qaldyrǵany daýsyz. Bul kúnderi álemniń ár qıyrynda ataqty mánerlep syrǵanaýshyny eske alýǵa arnalǵan sharalar úzdiksiz uıymdastyrylýda.
Arman OKTIаBR,
«Egemen Qazaqstan»
ALMATY