Reseıdiń dańqty balýany, erkin kúresten Olımpııa oıyndarynyń jeńimpazy, álemniń bes jáne Eýropanyń úsh dúrkin chempıony Hadjımurat Gasalov Almatydaǵy «Álem faıters» klýbyna arnaıy at basyn burdy.
Alataý baýraıynda atalmysh klýbtyń irgetasyn qalaǵan erejesiz jekpe-jek óneriniń has sheberleri – aǵaıyndy Nazarovtar ekenin jankúıer qaýym jaqsy biledi. Jas kezinen osy sportty serik etken Ardaq Quttyqojauly kóptegen baıraqty básekede Qazaq eli namysyn abyroıly qorǵap, talaı márte jeńis tuǵyrynyń eń bıik satysyna kóterildi. Birneshe ret álem chempıony atanyp, Alashtyń maqtan tutar ulyna aınaldy. Ardaqtyń týǵan inisi – Beıbit te osy ónerge myqtap den qoıyp, birqatar halyqaralyq týrnırlerde top jardy. Ol da dúnıejúzi chempıony atandy. Qazirgi kezde «Álem faıters» dep atalatyn kásipqoı sport klýbyn qurǵan aǵaıyndylar jastar men jasóspirimderge erejesiz jekpe-jek óneriniń qyr-syryn úıretýde.
Aǵaıyndy Ardaq pen Beıbit Nazarovtyń arnaıy shaqyrtýymen dańqty balýan Hadjımurat Gasalov óz áriptesterimen birge «Álem faıters» klýbynda qonaqta bolyp, osy jerde sheberlikterin shyndap júrgen órendermen emen-jarqyn júzdesti. 35 jastaǵy Soltústik Osetııanyń týmasy sheberlik sabaǵyn ótkizip, jas jetkinshekterge óziniń oń jambasyna keletin ońtaıly ádis tásilderdi úıretti. Kópshilik tarapynan qoıylǵan saýaldaryna jaýap berip, óziniń sport salasyndaǵy zor tájirıbesimen bólisti.
Erejesiz jekpe-jek álemindegi eń beldi nusqa – UFC ekeni ózderińizge jaqsy málim. Atalmysh uıymnyń asa aýyr salmaqtaǵy chempıondyq ataǵyn qazirgi kezde 39 jastaǵy AQSh-tyń apaıtósi Denıel Korme ıemdenip otyr. Kezinde erkin kúrespen shuǵyldanǵan sol sańlaq 2004 jyly Afıny Olımpıadasynyń jartylaı fınalynda dál osy Hadjımurat Gasalovpen kúsh synasty. Odan keıin olardyń joly taǵy bir márte qıysty. Eki retinde de osetın balýanynyń ústemdigi esh kúmán týǵyzǵan joq. «Álem faıterste» ótken kezdesý barysynda ataǵy alysqa jaıylǵan aıtýly qos balýan arasyndaǵy beldesýdiń qalaı órbigeni jaıynda da biraz áńgime boldy.
Osy mándi de maǵynaly kezdesýden keıin erejesiz jekpe-jekten álemniń birneshe dúrkin chempıony Ardaq Nazarov dańqty balýan Hadjımurat Gasalov pen onyń dostary – Edýard Bazrov jáne Danııar Kárimjannyń ıyǵyna qazaqtyń shapanyn japty.
Sóz oraıy kelgende, 15 jyldan asa Reseıdiń týy astynda tabysty óner kórsetip, kóptegen dúbirli dodalarda jeńis tuǵyrynyń eń bıik satysyna kóterilgen áıgli sportshy Hadjımurat Gasalov bul kúnderi Qazaqstanda eńbek etip, elimizdiń erkin kúres sheberlerin baptap júrgenin aıta ketýdi jón kórip otyrmyz.
Ǵalym SÚLEIMEN,
«Egemen Qazaqstan»
ALMATY