Elordada «Túrkııanyń syrtqy saıasaty jáne Qazaqstan – Túrkııa qarym-qatynastary» taqyrybynda BAQ ókilderine arnalǵan brıfıng ótti.
Jıyndy Túrkııanyń Qazaqstandaǵy Tótenshe jáne ókiletti elshisi N.Ýıanyk ashty. Brıfıng barysynda Túrkııa Respýblıkasynyń prezıdenttik júıege kóshýine qatysty «Bastamashyl jáne gýmanıtarlyq syrtqy saıasaty» keńinen sóz boldy.
«Gýmanıtarlyq syrtqy saıasat teorııasy arqyly elimizdiń áleýmettik máseleleriniń oń sheshim tabýyn kózdeımiz. Bul arqyly qoǵamdaǵy ár tulǵanyń adamı qundylyqtary, ar-ojdany, adam ómiri syndy máseleler el ishinde jáne halyqaralyq deńgeıde qorǵalyp keledi. Búginde BUU Bosqyndar isteri jónindegi Joǵarǵy komıssary basqarmasy usynǵan kórsetkishke sáıkes, Túrkııa álemdegi eń kóp bosqyn qabyldap otyrǵan el sanalady. Qazir elimizde 600 myńnan astam sırııalyq balalar bilim alýda. Olardyń 97%-y bastaýysh synyp jasyndaǵy bala. Sondaı-aq sırııalyq 20 myńnan asa jas bizdiń memleketimizde joǵary oqý oryndarynda bilim alyp jatyr», dedi N.Ýıanyk.
Jıynda belgili bolǵandaı, Túrkııa Respýblıkasy gýmanıtarlyq kómek kórsetý boıynsha «Global Humanitarian Assistance-2018 (GHA) baǵdarlamasynyń «Ǵalamdyq gýmanıtarlyq kómek» esebine sáıkes bıyl álem boıynsha birinshi orynǵa shyqqan. Qaıyrymdylyq jasaý isine Túrkııa tarapynan bıyl 8,07 mıllıard AQSh dollary jumsalǵan.
Sondaı-aq Túrkııa palestınalyq bosqyndar úshin kómek kórsetýshi UNRWA (Palestınalyq bosqyndar isimen aınalysatyn Taıaý Shyǵys agenttigi ) agenttigine demeý bolyp keledi. Atalǵan uıymǵa 2017 jyldyń ishinde túrik bıýdjetinen 1,5 mıllıon AQSh dollary bólingen. Atalǵan agenttik bosqyndardyń túrli áleýmettik máselelerin sheshýge kómektesti. Bul uıymǵa, sondaı-aq Qazaqstan Respýblıkasy da qolushyn sozdy. Jıyn barysynda Túrkııanyń Qazaqstandaǵy Tótenshe jáne ókiletti elshisi Qazaqstannyń UNRWA uıymyna kórsetken kómegi úshin alǵys bildirdi. Sondaı-aq memlekettik dárejede iske asyrylǵan sharalarǵa ekijaqty jáne kópjaqty yntymaqtastyqty kúsheıtýge arnalǵan qadamdardyń jalǵasyp kele jatqanyn atap ótti.
«Astana prosesiniń arqasynda ýaqytsha dostyq bitiminiń kúsheıtilýi, shıelenisti azaıtý memorandýmynyń ornatylýy jáne janjaldy taraptar arasynda senimdi arttyrý sharalarynyń qabyldanýy sııaqty máseleler boıynsha aıtarlyqtaı alǵa jyljý baıqalady. Qazaqstan Respýblıkasy Sırııa daǵdarysyna qatysty Astana prosesin uıymdastyryp, mańyzdy qoldaý kórsetýde. Bul qoldaý úshin erekshe rızashylyǵymyzdy bildiremiz», dedi elshi.
Sondaı-aq N.Ýıanyk TIKA men KazAID arasyndaǵy yntymaqtastyqtyń odan ári kúsheıýine tilektes ekenin bildirdi.
Marjan TILEÝBEK,
«Egemen Qazaqstan»