Áne-mine degenshe jazǵy sport básekeleri aıaqtalyp, qysqy sport túrleriniń shymyldyǵy túrilmek. Jyl basynda Ońtústik Koreıada ótken qysqy Olımpııa oıyndarynan keıin sportshylar qural-saımandaryn saılap, halyqaralyq dodalarda baq synaýǵa saqadaı-saı otyr. Olardyń arasynda qazaqstandyq sańlaqtar da bar. Osy rette qazaqstandyq sportshylar aldaǵy ýaqytta qaı sport túrinen qandaı baıraqty básekelerge qatysatyn jarys kestesi usynylyp otyr.
Konkı sporty
Konkı sportynan álem kýbogy Japonııada bastalyp, AQSh-ta óz máresine jetedi. Halyqaralyq konkıshiler odaǵy (ISU) jarııalaǵan kúntizbe boıynsha alǵashqy kezeń 14-18 qarasha aralyǵynda Japonııanyń Obıhıro qalasynda ótedi. Bes kezeńge sozylatyn álem kýbogynyń úsheýi Eýropa, ekeýi Azııa qurlyǵynda uıymdastyrylady. 1-kezeń – Japonııa (16–18 qarasha), 2-kezeń – Qytaı (23–25 qarasha), 3-kezeń – Germanııa (7–9 jeltoqsan), 4-kezeń – Nıderlandy (14–16 jeltoqsan), 5-kezeń – Norvegııa (1–3 aqpan). Byltyrǵy álem kýbogynda qazaqstandyq konkıshiler arasynda eń úzdik nátıjege Ekaterına Aıdova qol jetkizdi. Ol 1000 metrlik saıysta 131 upaı jınap, 12-orynǵa taban tiregen. Komandalyq jarys boıynsha Qazaqstan quramasy 9 jáne 12-oryn ıelengen-di.
Shańǵy jarysy
Shańǵyshylar bıylǵy maýsymdy 25 qarasha kúni Fınlıandııanyń Rýka qalasynan bastaıdy. 23 kezeńge jalǵasatyn baıraqty báseke 2019 jyldyń 24 naýryzynda Kanadanyń Kvebek qalasynda óz máresine jetedi. Sondaı-aq osy aralyqtaǵy negizgi jarys álemniń 10 elindegi 18 qalada ótedi. Olardyń arasynda Lıllehammer, Oslo (Norvegııa), Davos (Shveısarııa), Drezden (Germanııa) jáne taǵy basqa iri qalalar bar.
О́tken maýsymda qazaqstandyq shańǵyshy Alekseı Poltoranın Italııa, Fınlıandııa jáne Slovenııada ótken 15 shaqyrymdyq qashyqtyqta top jardy. Sonymen qatar bir ret kúmis júlde, bir ret qola medal ıelendi. Álem kýbogynyń qorytyndysy boıynsha Poltoranın 796 upaı jınap, álemdegi eń úzdik 7 shańǵyshynyń qatarynan kórindi.
Frıstaıl (mogýl)
Frıstaıldyń mogýl túrinen álem kýbogy 2018 jyldyń 7 jeltoqsanynda Fınlıandııanyń Rýka qalasynda bastalyp, 2019 jyldyń 3 naýryzyndaǵy Almatydaǵy Shymbulaqta aıaqtalady. Shymbulaq – tuńǵysh ret álem kýbogyn qabyldaıdy. Munyń ózi Qazaqstannyń mogýl sportynan bási bıik ekenin bildiredi. О́ıtkeni byltyrǵy maýsymda erler arasynda otandasymyz Dmıtrıı Reıherd tórt ret ekinshi oryn, úsh ret qola júlde alsa, Pavel Kolmakov bir ret úzdik úshtiktiń qatarynan kórindi. Al qyzdar arasynda Iýlııa Galysheva bir retten altyn, kúmis, qola júlde ıelendi. Sondaı-aq 2018 jylǵy Olımpııa oıyndarynda qola júldege qol jetkizdi. Bıylǵy álem kýbogy jarysy Qytaı, Kanada, AQSh jáne Japonııada ótedi.
Short-trek
Short-trekten álem kýbogynyń alǵashqy kezeńi 2 qarasha kúni Kanadanyń Kalgarı qalasynda bastalyp, otandasymyz Abzal Ájǵalıev 500 metrlik básekede fınalǵa deıin alqynbaı jetip, kúmis medaldy ıelendi. Ol Kanadada 40.136 sekýnd nátıje kórsetip, Qazaqstannyń jańa rekordyn tirkedi. Sonymen qatar Abzal byltyrǵy maýsymda dál osy qashyqtyqta da kúmis júlde alǵan. Al 1000 metrde Nurbergen Jumaǵazıev márege úshinshi kelip, qolany qanaǵat tutqan-dy.
Jalpy short-trekten 2018-2019 maýsym alty kezeńnen turady. Eń qyzyǵy, álem kýbogynyń úshinshi kezeńi tuńǵysh ret Qazaqstanda, 7-9 jeltoqsan kúnderi Almaty qalasynda ótedi.
Bıatlon
Bıatlon sportynan 2018-2019 maýsymyndaǵy álem kýbogy jarysynyń alǵashqy kezeńi 2018 jyldyń 2–9 jeltoqsan aralyǵynda Slovenııanyń Poklıýka qalasynda bastalyp, 18–24 naýryzda Norvegııanyń Holmenkollen qalasyndaǵy 9-kezeńmen aıaqtalady. Álem kýbogynyń bıylǵy kestesi mynadaı: 2-kezeń – Aýstrııa (10–16 jeltoqsan), 3-kezeń – Chehııa (17–23 jeltoqsan), 4-kezeń – Germanııa (7–13 qańtar), 5-kezeń – Germanııa (14–20 qańtar), 6-kezeń – Italııa (21–27 qańtar), 7-kezeń – Kanada (4–10 aqpan), 8-kezeń – AQSh (11–17 aqpan). Al álem chempıonaty Shvesııanyń Estersýnd qalasynda 7–17 naýryz aralyǵynda ótedi. Aıta keteıik, byltyr Shvesııanyń Estersýnd qalasynda ótken álem kýbogynyń alǵashqy kezeńindegi aralas estafetada otandastarymyz Maksım Braýn men Galına Vıshnevskaıa máre syzyǵyn úshinshi kesip, bıatlon sportyndaǵy alǵashqy qola júldeni el qorjynyna salǵan edi.
Mánerlep syrǵanaý
Mánerlep syrǵanaý sportynan jyldyń negizgi iri týrnırleri tamyz aıynda bastaldy. Búginge deıin Lombardia Trophy, U.S. International Figure Skating Classic, Skate America jáne Skate Canada sekildi halyqaralyq básekeleri ótti. Qazaqstandyq sportshylar arasynan Elızabet Tursynbaeva úsh halyqaralyq týrnırge qatysyp úlgerdi. Slovakııada ótken Ondrej Nepela Trophy-2018 týrnırinde eki baǵdarlama boıynsha 192.30 upaı jınap, ekinshi orynnan kórinse, araǵa 20 kún salyp Fınlıandııada uıymdastyrylǵan Finlandia Trophy básekesinde kúmis júldeger atandy. Bul týrnırde otandasymyz 200,74 upaı jınady. Al Skate Canada týrnırinde besinshi oryn ıelendi.
Aldaǵy ýaqytta otandyq mánerlep syrǵanaýshylardy Alpen Trophy (Aýstrııa), Trophée de France (Fransııa), Golden Spin (Horvatııa), Gran-prı jarysynyń fınaly (Kanada), Tórt qurlyq chempıonaty (AQSh), álem chempıonaty men komandalyq álem chempıonaty (Japonııa) kútip tur.
Álı BITО́RE,
«Egemen Qazaqstan»