Únemdelgen ýaqyt dárigerge de, syrqatqa da tıimdi

Endi emhana medısınalyq aqparattyq júıeni engizýdiń qanatqaqty jobasyna qatysyp, aýrýlarǵa odan saıyn qolaıly jaǵdaı týǵyzyp otyr. Osydan birneshe aı buryn emhananyń kire­berisinde uzynnan uzaq sozyl­ǵan tirkeý orny bolatyn. Onda qaratorǵaıdaı qatarlasyp otyrǵan kishi medısına qyzmetkerleri kelýshilerge qyzmet kórsetetin. Olar adamdardyń aýrý derekteri jazylǵan kartalaryn jaǵalaı qoıylǵan shkaftarda álipbı bo­ıynsha ornalastyrylǵan tizimnen izdep taýyp, qolyna ustatady. Syrqaty janyna batyp turǵan adamdar medbıke kartasyn tapqan­sha kútetin. Keıde tirkeý ornynan álgi kartochka tabylmaıdy, sodan aıqaı-shý da bolmaı qal­maıtyn. Medbıke kezektegi ıiri­lip turǵan adamdardy tastaı sala, júgirip ketedi, álgi kartany dáriger kabınetteriniń birinen taýyp ákeledi, tappasa qaıtadan karta arnaıdy. Olaqtyǵyn usaq-túıek­tiń yǵyna qoıatyn qaze­kem flıýrografııaǵa túsken plen­ka­synyń qaıda qalǵanyn bilmeıtin kezi az emes. Endi osy áńgimeniń barlyǵy da emhananyń tarıhyna aınaldy. Biz kelgende burynǵy bir qabyrǵany alatyn shubalań tirkeý orny eleýsiz ǵana bir buryshqa yǵysypty. Emhananyń kireberisi jadyrap, keńı túsken. 

«Sıfrly Qazaqstan» baǵdar­lamasy aıasynda qolǵa alynǵan jumystardyń jemisi aıshyq­ty kórinip otyrǵan emhana aldymen kompıýterlermen jabdyq­tal­dy. Qazir munda 135 sý jańa kompıýter jumys istep tur. Bul emhananyń «Qaǵazsyz aýrýhana» jobasy sheńberinde emdelýshiniń ambýlatorlyq kartasyn qaǵazdan tolyq elektrondy nusqaǵa kóshi­rýge múmkindik berdi. 

– Ázirshe bizdiń emhananyń ózinde 11 myńnan asa dıspanser­lik esepte turatyn aýrýlardyń, belgili merzimde medısınalyq-saraptamalyq komıssııadan ótip turatyn múgedek jandardyń jáne bes jasqa deıingi balalardyń medısınalyq kartasynyń qaǵaz nusqasy da saqtalady. Olardyń jeke kartasynyń elektrondy nusqasy da bar. Bul ýaqytsha, keıin sıfrlandyrý isi tolyq júr­gende munyń barlyǵy da tek elektrondy nusqada qalady, – deıdi №4 qalalyq emhananyń bas dárigeri Margarıta Bısenova. 

Qazir emhana dárigerleri syr­qat jandy otyrǵyzyp qoıyp, onyń kartasyn aýdarystyr­maı­dy. Emdelýshiniń jeke kýáli­gin­degi jeke sáıkestendirý nómi­rin salǵanda baǵdarlamadan onyń bar­lyq aýrý tarıhy, qandaı em alǵany, qandaı dári-dármek paı­da­lanǵany, alynǵan medı­sına­lyq taldaýlardyń nátıjesi shy­ǵyp turady. Aýrý jannyń dári­gerge kelip kórinýine ketetin ýa­qyt bu­rynǵyǵa qaraǵanda 3 ese qys­qarǵ­an. Bas dáriger Marga­rı­ta Bı­senova­nyń aıtýynsha, buryn dári­ger aýrýdy 15 mınýt qaraýy tıis bolsa, sonyń kem degen­de jar­tysy qaǵaz jazýmen kete­tin. Q­azir istiń jiptikteı bolyp shı­raı tús­kenin tek dáriger ǵana emes, em­de­lý­shilerdiń ózi de baıqady. Dári­gerine kelgen aıaǵy aýyr Áıgerim Eltaeva qal­ta­sy­nan telefonyn aldy da, oǵan ornalas­tyrǵan DamuMed qosym­shasyn kórsetti. 

– Men burynnan osy emhanada tirkeýdemin. Dárigerge baratyn bolsam, myna qosymsha arqyly úıde otyryp-aq qashan barýym kerektigin anyqtaımyn, aýyrǵanym týraly anyqtama alamyn, laboratorııalyq taldaýlar­dyń nátıjesin bilemin. О́te yń­ǵaı­ly. Al buryn dárigerge baratyn kúni túske deıin ýaqytymyz ketetin, – deıdi Á.Eltaeva.

Qazir №4 emhanaǵa qaladaǵy 73 115 turǵyn tirkeldi. Sonyń ishin­de 69 myń adamǵa elektrondy medısınalyq densaýlyq tólquja­ty jasaldy. Tirkeý qyzmetiniń qyzmet­kerleri 40 paıyzǵa qys­qartylyp, olar qazir emhanadaǵy basqa jumystarǵa aýystyryldy. Qysqarǵan eshkim joq. 

– Medısına salasyn sıfr­landyrý eń aldymen osy saladaǵy ju­mys­tardyń móldirligin qamta­ma­syz etedi, sosyn ýaqytty ba­ryn­­sha únemdeıtin bolady. Ýa­qyt­ty únemdeý dárigerge de, pa­­sıentke de óte tıimdi. Artyq ýaqytta dáriger naýqasqa kóbirek kóńil bóletin bolady, adamdar ózin aýrýdyń aldyn alýǵa baǵyt­taıdy. Demek, únemdelgen ýaqyt densaýlyqqa qyzmet etedi, – deıdi Respýb­lı­ka­lyq elektrondy densaý­lyq or­ta­lyǵy oblystyq fılıa­ly­nyń dırektory Andreı Solovev.

Bul jumys oblys boıynsha da qarqyn alyp keledi. Búginde óńirde 121 formanyń 64-i elek­tron­dy nusqaǵa kóshirildi. And­reı Nıkolaevıchtiń aıtýynsha, sıfr­landyrý isi tez júrip, nátı­je berý úshin adamdardyń kompıý­terlik saýaty kóterilýge tıisti. Oblysta 546 kompıýter jáne sıf­r­landyrý tájirıbesin úıretý be­ket­teri jumys istep tur. Tele­fon­daǵy mobıldik qosym­shany 2 mıllıonǵa jýyq adam qol­dana bastady. Biraq bul emha­nalarǵa tirkelgen adamdardyń 10,8 paıyzy ǵana. Osy kezge deıin 10 mıllıonnan astam medı­sınalyq elektrondy tólqujat toltyrylǵan. Aldaǵy ýaqytta emhanalar men aýrýhanalarda sıfr­landyrý isi qarqyn alý úshin olardy kompıýtermen qamtamasyz etý isi jalǵasyp jatyr. 

Názıra JÁRIMBET,

«Egemen Qazaqstan»

QOSTANAI