Memleket jáne qoǵam qaıratkeri, fılologııa ǵylymdarynyń doktory, professor Myrzataı Joldasbekov Elordadaǵy Ulttyq akademııalyq kitaphana qoryna jyldar boıy syrlasy, muńdasy bolǵan kitap qorynyń bir bóligin tabys etti.
Jıyn «Kitaptarymnan basqa baılyǵym joq» dep bastalyp, estelikterge jalǵasqan Myrzataı Joldasbekovtiń taǵylymdy áńgimesinen bastaldy.
Sharaǵa Halyqaralyq túrki akademııasynyń prezıdenti Darhan Qydyráli, Ulttyq akademııalyq kitaphananyń dırektory Úmithan Muńalbaeva, Qazaqstannyń eńbek sińirgen qaıratkeri Bolat Bodaýbaı, Myrzataı Joldasbekovtiń nemeresi – Aqbota Joldasbekova jáne Irannan kelgen qonaqtar men elimizdiń zııaly qaýym ókilderi qatysty.
Basqosý barysynda professor kitaphana qoryna «Qazaq Sovet ensıklopedııasynyń» 12 tomdyǵyn jáne «Bolshaıa sovetskaıa ensıklopedııa» kitabynyń 31 tomdyǵyn tartý etti. Bul kitaptar endigide «Myrzataı Joldasbekovtiń Memorıaldyq kitap kolleksııasy» zalynyń sórelerinen oryn alyp, el ıgiligine qyzmet etetin bolady.
Bul kitaptardyń jeke kitaphana qoryna qalaı túskenin eske alǵan ol:
«Bizdiń kezimizde bir jarys bolatyn, rýhanı jarys. El qoryna kelgen kitapty qolymyzǵa ustaı almasaq dúnıeniń eń qyzyǵynan qur qalǵandaı bolatynbyz. Men tipti Ortalyq partııa komıtetiniń ıdeologııa bólimin basqaryp turǵan kezimde bári meniń qolymda bolsa da, bul kitapty qolǵa túsire almadym. Sebebi, myna «Bolshaıa sovetskaıa ensıklopedııaǵa» jazylý menen buryn júrip ketken. Bir kúni nemerem – Aqbota dúken aralaǵanda osyny kóripti. Osylaısha, 31 tomdyq kitapty túgel satyp aldy», dedi.
Kezdesý ortasynda sóz alǵan Darhan Qydyráli de «qur qol» kelmepti, kitaphana qoryna Halyqaralyq Túrki akademııasy basyp shyǵarǵan «Jamıǵat-at taýarıh» kitabyn syıǵa tartty:
«Kitap – syrlasyń da, muńdasyń da, ol – tozbaıtyn baılyq, sarqylmaıtyn qazyna. Men Myrzataı Joldasbekovtyń jeke kitaphanasyna Rashıd ad-dınniń «Jamıǵat-at taýarıh» kitabyn tartý etemin, naǵyz tarıh osynyń ishinde. Kitap kitaphana arqyly ǵana el ıgiline aınalady», dedi Halyqaralyq túrki akademııasynyń prezıdenti.
Jıyn barysynda halqymyzdyń asyl qazynasyna aınalǵan –kitaphana sapasyn kóterýge baǵyttalǵan usynystar da talqylandy.
Qarlyǵash QURAMYS,
«Egemen Qazaqstan»