Elimizdiń agrarlyq ǵylymyn bıznestiń suranysyna qaraı jańǵyrtýdaǵy basym baǵyttyń biri – aýylsharýashylyq salasyna jańa tehnologııalardy júıeli tartý. Elbasy Joldaýynda da elimizdiń agroónerkásiptik keshenin zaman talaptaryna saı ınnovasııalyq jolmen damytýǵa qatysty naqty mindetter júktelgen. Osy oraıda Almatyda «Ǵylym men bilimge negizdelgen agroónerkásiptik keshendi qalyptastyrý máseleleri» taqyrybynda halyqaralyq forým ótti.
Búgingi kúni elimizdiń aýylsharýashylyq salasynyń aldynda eńbek ónimdiligin arttyryp, óńdelgen aýylsharýashylyq óniminiń eksportyn 2,5 esege kóbeıtý mindeti tur. Bul maqsattarǵa jetý úshin zamanaýı tehnologııalardy meńgergen, ınnovasııaǵa beıim, óndiristiń jańa baǵyttaryn ıgergen, ǵylymı jetistikterdi óndiriske engizip, jańasha oılaı alatyn kásibı mamandar qajet. Atalǵan baǵyttardy jandandyrý maqsatynda salany basqarýdyń tyń ádisterin qoldanyp, aýylsharýashylyǵy boıynsha sheteldiń bilikti mamandarynan tájirıbe alyp, ozyq tehnologııalaryn tartýdyń mańyzy zor.
Agrarlyq saladaǵy ózekti máselelerdi talqyǵa salǵan forým jumysyna Premer-Mınıstrdiń orynbasary – Aýyl sharýashylyǵy mınıstri О́mirzaq Shókeev, Fransııa aýylsharýashylyq zertteýler ınstıtýtynyń eks-prezıdenti Gı Rıba, Parlament depýtattary, memlekettik jáne jergilikti atqarýshy organdar ókilderi, salalyq odaqtar men assosıasııalar, agrarlyq JOO basshylary, aýylsharýashylyq taýar óndirýshileri, bilikti ǵalymdar qatysyp, agroónerkásiptik keshendegi ózekti máseleler tóńireginde pikir almasyp, óz usynystaryn ortaǵa saldy. Forým barysynda agrarlyq bilim berýdiń jańa baǵyttary, ǵylym men óndiris ıntegrasııasy saralanyp, bilimniń eńbek ónimdiligine transformasııalaný máseleleri sóz boldy.
Forým jumysyn ashqan О́mirzaq Shókeev: «Aýylsharýashylyǵyn ınnovasııalyq baǵytta damytý úshin birinshi kezekte bilikti mamandar men jańa tehnologııalar qajet. Sondyqtan salany jańǵyrtýda bilim men ǵylym mańyzdy ról atqarady», dep atap ótti.
Qazirgi tańda mınıstrlik respýblıkamyzdyń ár aımaǵynda fermerlerge qyzmet kórsetetin, jańa tehnologııalar transfertin iske asyratyn, ozyq tehnologııalarmen tanystyryp, aýylsharýashylyq qurylymdary mamandaryn qaıta oqytyp, daıarlyqtan ótkizetin agroparktar men aımaqtyq ortalyqtar, jańa tehnologııalardy usynatyn kórsetilim alańdaryn ashýda. Mamandar bul baǵytta qolǵa alynǵan naqty mindetter agrarlyq salanyń jańa tynys alýyna jol ashady dep otyr.
Arman OKTIаBR,
«Egemen Qazaqstan»
ALMATY