О́skemen qalasynda Memlekettik «Daryn» jastar syılyǵynyń laýreaty, rejısser, akter Rústem Esdáýletovti eske alýǵa arnalǵan kishi formada sahnalanǵan spektaklderdiń II respýblıkalyq teatr festıvali shymyldyq túrdi.
Aıtýly sharaǵa Qazaqstan Jazýshylar odaǵynyń tóraǵasy, aqyn Ulyqbek Esdáýlet, rejısser Ersaıyn Tápenov jáne Erkin Jýasbek, Baqyt Nurpeıis, Merýert Jaqsylyqova, Anar Erkebaı bastaǵan belgili teatr synshylary qatysty.
– Rústem jańashyl, jańalyqshyl bolatyn. Armandary kóp edi. Qazaq teatryn qaıtsem bıik deńgeıge kóteremin dep júrip tipti ózin umytyp eńbek etti. Rústem úshin birinshi orynda únemi óner turatyn. О́skemenge kelip tyńnan túren salyp, tosyn, tyń eksperımentterge bardy. О́ner áleminde óz súrleýin salýǵa umtyldy. Sol úshin de áli eshkim baspaǵan, eshkim tájirıbesinde qoldanbaǵan tosyn sheshimderge bardy. Kórermenin ónerdiń óz tilimen tańǵaldyrýǵa janyn berdi, – dedi Qazaqstan Jazýshylar odaǵynyń tóraǵasy, aqyn Ulyqbek Esdáýlet festıvaldiń ashylý saltanatyna sóılegen sózinde.
Ras, jasyndaı jarq etip, nebári 31 jasynda quıryqty juldyzdaı aǵyp túsken talant ǵumyry san qyrlylyǵymen, jańalyqshyldyǵymen daralandy. Onyń aıqyn dáleli – Rústem Esdáýletov teatr rejısseri ǵana emes, sondaı-aq aqyn, akter, kınorejısser retinde de kópshilikke jaqsy tanys. «Bórinama» jyr jınaǵynyń avtory. О́leńderi «HHI ǵasyr antologııasyna» jáne basqa da ujymdyq jınaqtarǵa endi. «Lave», «Obratnaıa storona» fılmderine túsip, ózi de kıno túsirdi. Oralhan Bókeıdiń «Bes tıyn» áńgimesiniń jelisi boıynsha túsirgen komedııasy 2007 jyly «Sháken juldyzdary» kınofestıvalinde arnaıy marapatqa ıe boldy. Al teatr rejısseri retinde Rústemniń qoltańbasyna tıesili «Atymdy adam qoıǵan soń», «Tolǵaq» syndy spektaklderi de talaı festıvalde top jaryp, teatr áleminiń jańalyǵyna aınalǵan bolatyn.
Festıvaldiń ashylý saltanatynda óner ıesiniń ómiri men shyǵarmashylyǵyn jan-jaqty zerdelegen «Bórinama» derekti fılminiń tusaýkeseri ótip, talant ǵumyrynan syr qozǵaıtyn estelikter aıtylyp, rejısserdiń spektaklderinen úzindiler kórsetildi.
Eki jylda bir ret ótkiziletin aıtýly festıvalge bıyl О́skemenniń óz teatrlarynan bólek, Astana, Almaty, Qaraǵandy, Petropavl, Pavlodar, Semeı qalalary men Túrkistan oblysynyń Jetisaı qalasynan barlyǵy
9 teatr qatysyp, baq synaıdy.
Nazerke JUMABAI,
«Egemen Qazaqstan»