Astana qalasynda qoıylǵan «Mahabbat munarasy» mıýzıkli jańa oblys ortalyǵy Túrkistanda alǵash ret sahnalandy. Q.A.Iаsaýı atyndaǵy HQTÝ-dyń Mádenıet saraıynda mıýzıkldiń premerasy ótti.
Týyndyny tamashalaýǵa kelgen qala turǵyndary, ásirese jastar kóp boldy. Qoıylym shymyldyǵy ashylar aldynda Túrkistan oblysynyń ákimi Janseıit Túımebaev oblystyq opera jáne balet teatry ujymyn quttyqtap, ónerdi damytýǵa úles qosyp halyqtyń alǵysyna bólený jolyndaǵy eńbekteriniń eselene berýine tilektestigin bildirdi. Mahabbat lırıkasy beınelengen týyndyny sahnalaýǵa teatrdyń 60-tan astam ártisi qatysqan. Mıýzıkldiń áýenin jazǵan kompozıtor Svetlana Ahmetova, mýzykasyn óńdegen kompozıtor Rýslan Shynyqulov. Al mıýzıkldiń sózin jazǵan jas aqyn Muqaǵalı Kenjetaıuly, sahnalaǵan Muhtar Áýezov atyndaǵy akademııalyq qazaq drama teatrynyń qoıýshy – rejısseri Elik Nursultan.
О́ńir jastarynyń ómirinen alynǵan, mahabbat jolyndaǵy adaldyq pen batyldyq, qyzǵanysh pen kúres kórinisterin sýretteıtin, zamanaýı lırıkalyq shyǵarma eki kórinisten turady. Mıýzıkldiń bas keıipkeri Aıan súıiktisi Madına ekeýiniń mahabbatyn qorǵaý úshin eshteńeden taıynbaıdy. Madınanyń sahnada án aıtýǵa degen yqylasy men armany qos ǵashyqtyń arasynda qyzǵanysh týǵyzyp, kelispeýshilikke aparady. Degenmen jastar oqıǵasyn sýretteıtin mıýzıkldiń barlyq keıipkerleri óz muratyna jetedi. Búgingi jastar ómiri shynaıy sýrettelgen qoıylym kórermender kóńilinen shyǵyp, qoshemetke ıe boldy.
Ǵalymjan ELShIBAI,
«Egemen Qazaqstan»
Túrkistan oblysy