Ortalyq kommýnıkasııalar qyzmetinde «Orta bilim berýdi jańǵyrtý» jobasyn resmı iske qosýǵa arnalǵan baspasóz máslıhaty ótti. Sharaǵa Bilim jáne ǵylym vıse-mınıstri Elmıra Sýhanberdıeva, Dúnıejúzilik banktiń bilim tájirıbesi boıynsha basqarýshysy Harrı Patrınos jáne Dúnıejúzilik banktiń Qazaqstandaǵy turaqty ókili Ato Braýn qatysty.
Jobanyń jalpy quny – respýblıkalyq bıýdjetpen qarjylandyrylatyn salyqty qosa eseptegende 75 mln AQSh dollary. Josparǵa sáıkes bul qarajatqa aýyldyq mektepterge oqý materıaldary men mýltımedııalyq qural-jabdyqtar satyp alynyp, bilim berý baǵdarlamalary jaqsartylatyn bolady. Sondaı-aq aýyldyq mektepterdegi muǵalimderdiń áleýetin arttyrý boıynsha sharalar qoldanylyp, erekshe qajettilikteri bar balalarǵa qoldaý kórsetiledi. Joba sheńberinde bilim berýdiń jańartylǵan mazmunyn qoldaýǵa baǵyttalǵan bastamalar kesheni júzege asyrylady dep kútilýde.
«Búgin orta bilim júıesiniń sapasyn arttyrý, bilim berýdegi qoljetimdilik pen teńdikti jetildirý maqsatynda Qazaqstan Respýblıkasy men Dúnıejúzilik bank arasyndaǵy kelisim sheńberinde júzege asyrylatyn «Orta bilim berýdi jańǵyrtý» jobasynyń resmı ashylýyn jarııalaımyz. Bul joba Elbasynyń «100 naqty qadam» Ult josparynyń 76-qadamynda, Bilim jáne ǵylymdy damytýdyń 2016-2019 jyldarǵa arnalǵan baǵdarlamasynda belgilengen basymdyqtarǵa sáıkes keledi. Jobanyń maqsaty orta bilim júıesiniń sapasyn kóterý, jańǵyrtýdy qoldaý, bilim berýdegi qoljetimdilik pen teńdikti arttyrý, qala jáne aýyl oqýshylary arasyndaǵy oqý úlgeriminiń alshaqtyǵyn tómendetý. Kelisim jańartylǵan bilim berý mazmunyn qoldaýdaǵy qozǵalǵan bastamalar keshenin qamtıdy. Jobanyń negizgi baǵyttarynyń biri – bilim berý materıaldaryna qoljetimdilikti arttyrý, mýltımedııalyq jabdyqtarmen jaraqtaý jáne aýyl mektepteri muǵalimderiniń áleýetin kóterý arqyly aýyldyq jalpy orta bilim beretin mektepter men shaǵyn jınaqtalǵan mektepterdiń oqýshylarynyń úlgerimin jaqsartý. Osylaısha, jobanyń jalpy qarajatynyń 60 paıyzy 5 myńnan astam aýyldaǵy, ásirese shalǵaıdaǵy aýyldardaǵy mektepterdi mýltımedııalyq jabdyqtarmen jaraqtandyrýǵa baǵyttalǵan. Bul jańa sıfrly bilim berý resýrstaryna qoljetimdilikti jaqsartyp, halyqaralyq testileýdi onlaın formatynda ótkizý úshin materıaldyq-tehnıkalyq qoldaý kórsetedi. Oǵan qosa osy sharalar qala jáne aýyl mektepteri oqýshylary arasyndaǵy oqý úlgeriminiń alshaqtyǵyn tómendetýge yqpal etedi. Pedagogıkalyq bilimdi jańǵyrtýǵa jeke kóńil bólinýde. Pedagogıkalyq mamandyqtarǵa arnalǵan jańa 30 bilim berý baǵdarlamalary men bolashaq muǵalimdi daıyndaýdyń jańa modeli jasalady. Sonymen qatar, 16 pedagogıkalyq joǵary oqý oryndarynyń materıaldyq tehnıkalyq bazasyn kúsheıtýge qomaqty qarjy bólinedi», dedi E.Sýhanberdıeva.
Kelisimniń taǵy bir mańyzdy baǵyttarynyń biri – ınklıýzıvti bilim berýdi qoldaý. Erekshe bilim alý qajettilikteri bar balalarǵa sapaly bilim berý de atalǵan jobanyń ajyramas bóligi deýge bolady.
«Jobanyń basty benefısıarlary 3 mln-nan astam mektep oqýshylary, onyń ishinde erekshe bilim qajettilikteri bar balalar, aýyl mektepteriniń 170 myń muǵalimi men dırektory, pedagogıkalyq joǵary oqý oryndarynyń stýdentteri bolmaq. Joba ınstıtýsıonaldyq deńgeıde elimizdiń ár mektebiniń, ásirese qıyn jaǵdaıdaǵy mektepterdiń áleýetin kóterýge múmkindik beredi, orta bilim sapasyn arttyrady», dedi vıse-mınıstr.
Jıyn sońynda uıymdastyrýshylar ulttyq deńgeıdegi joba elimizdiń turaqty damýy úshin adam kapıtalyn nyǵaıtýǵa múmkindik beretinin, sonymen qatar qoǵamǵa ońtaıly áleýmettik-ekonomıkalyq áser qaldyratynyn tilge tıek etti.
Raýan QAIDAR,
«Egemen Qazaqstan»