«Egemen Qazaqstan» gazeti – qansha jyldan beri qazaq oqyrmandarynyń eń senimdi serigi. Onyń elimizdiń eń bedeldi, eń kóp taralymy bar, eldegi barlyq taqyrypqa ún qatatyn basty gazetine aınalǵanyna qanshama jyl. Aty da, basshylary da ózgerip jatty, biraq «Egemen Qazaqstannyń» eldiń ómirin jan-jaqty kórsetýge arnalǵan saıasaty áli kúnge deıin tolastaǵan joq.
Bul gazetten ne tabýǵa bolady? Gazetten elimizdiń ishki-syrtqy saıasatyn, olardyń qalaı júrgizilip jatqanyn, Prezıdenttiń Joldaýy men onyń túsindirilýin, odan keıin «Rýhanı jańǵyrý» atty ári saıası, ári mádenı, ádebı, ómirimizdiń salalaryn halyqqa jan-jaqty túsindiretin, tanystyratyn rýbrıkalar taba alamyz. Ol qalaı júrip jatyr, biz rýhanııat jaǵynan qalaı jańǵyryp jatyrmyz, ol úshin qandaı mindetterdi atqaryp jatyrmyz, sheteldermen baılanysymyz qandaı dárejege jetti, buryn ol aqsap turǵan másele edi, tek qana ánshilerimiz baryp qaıtqany bolmasa, jappaı qazaq ádebıeti men mádenıetin shetelge tanystyrý bolyp kórmegen edi. Bul gazette osy másele qazir keńinen nasıhattalýda. Teatr, kıno festıvaldary ótip jatyr. Bizdiń kınolarymyzdyń sheteldik jeńisteri – osylardyń bári eldi qýanta ma? Qýantady! Armandadyq pa? Armandadyq! Qashan bolady dedik pe? Dedik! Mine, osy týraly materıaldardy gazet betinen oqyp turýǵa múmkindik bar.
Ádebıet salasy bolsyn, óner salasy bolsyn, ekonomıka salasy bolsyn, tarıh, jeke tulǵalar, buryn kómeski bolyp kelgen tarıh betteri – solardyń bári qazir elge tanylýda. Árıne, gazet elimizdiń jetistigin kóbirek aıtady, onsyz taǵy bolmaıdy. Ylǵı synı materıaldar bola berse, ózimizden ózimiz pushaıman bolyp ketpeımiz be?! Sondyqtan elimizde bolyp jatqan ózgeristerdi, kórinisterdi, jańa baǵyttardy bilý úshin osy gazetti ashamyz. Tarıhty bilgińiz kelse, «Egemenniń» betin ashyńyz. Tarıhı tulǵalardyń ómirimen tanysqyńyz kelse, «Egemen» gazetin oqyńyz. Ádebıettiń búgingi tynysyn, erteńgi bolashaǵyna boljamdy bilgińiz kelse, osy gazetti qolǵa alyp kórińiz.
Bul gazet – oqyrmandarymyzdyń eń senimdi serigi jáne elimizde eń kóp taraǵan basylymdardyń biri. Sondyqtan ózim qansha jyldan beri osy «Egemen Qazaqstan» gazetin oqyp kele jatyrmyn. Gazet bolǵan soń árkimniń ártúrli pikiri bola beredi. Soǵan qaramastan, «Egemen Qazaqstan» elimizdegi baspasózdegi kóshbasshy ekenin tanytyp kele jatyr. Sol tuǵyrynan túspesin! О́mirdiń barlyq salasyn bilgilerińiz kelse, ózderińizdiń senimdi serikterińiz – osy «Egemen Qazaqstan» jazdyrtyp alyp, úıde oqyńyzdar. Meniń aıtatynym osy.