Memleket basshysy Nursultan Nazarbaev «KIMEP ýnıversıteti» aksıonerlik qoǵamynyń prezıdenti Chan Ian Bengti qabyldady, dep habarlady Prezıdenttiń baspasóz qyzmeti.
Kezdesý barysynda Nursultan Nazarbaevqa KIMEP ýnıversıtetiniń qazirgi jumysy jáne osy oqý ornyn damytý josparynyń iske asyrylýy jóninde málimet berildi.
Qazaqstan Prezıdenti qazirgi zaman ekonomıkasynyń talaptaryna saı bilikti mamandar daıyndaý isindegi ýnıversıtet jumysynyń tıimdiligin atap ótti.
– Ýnıversıtet 1992 jyly qurylǵan. Osy jyldar ishinde 12 myńǵa jýyq stýdent oqýyn bitirip shyqty. Búginde munda álemniń ártúrli elderinen kelgen oqytýshy-professorlar quramy eńbek etedi. 29 bilim baǵdarlamasy boıynsha 2109 stýdent aqyly negizde oqyp jatyr, – dedi Elbasy.
Ch.Beng ýnıversıtet túlekteriniń 93 paıyzy oqý bitirgen soń 6 aıdyń ishinde jumysqa ornalasatynyn aıtty.
Sonymen qatar «KIMEP ýnıversıteti» aksıonerlik qoǵamynyń prezıdenti bıyl oqý orny Bilim berý sapasyn qamtamasyz etý jónindegi táýelsiz agenttiktiń tujyrymy boıynsha ǵylym jáne bilim salasyn damytý isinde úzdik dep tanylǵanyn atap ótti.