28 qarasha kúni Astanadaǵy «Nurorda» mektep-lıseıinde «BILIM-INNOVASIIа» jáne «Bilim Orda» Halyqaralyq qoǵamdyq qorynyń uıymdastyrýmen «Uly dalanyń jasampaz jastary» atty Respýblıkalyq ınterbelsendi ashyq sabaǵy ótti.
Respýblıkalyq ashyq sabaqqa Qorlarǵa qarasty 30-dan astam bilim berý mekemeleriniń ustazdary, ata-analary jáne oqýshylary onlaın telekópir arqyly qatysty.
Ashyq sabaq barysynda oqýshylar Elbasy N.Á.Nazarbaevtyń «Ulttyq tárbıe modeli: Rýhanı jańǵyrý» baǵdarlamasyn iske asyrý jáne «Uly dalanyń jeti qyry» atty maqalasyndaǵy keleli máselelerdi 3 topqa bóliný arqyly taldap, ózindik erekshelikteri men elimizdiń mádenı jáne rýhanı damýy úshin jeti tarıhı jaıtqa súıengen alty iri joba jóninde óz pikirlerin bildirdi. Oqýshylar Elbasynyń «Uly dalanyń jeti qyry» atty maqalasyn zamanaýı túrde jańasha ádistermen iske asyrý qajet ekendigin alǵa tartady.
"Búgingi respýblıkalyq ashyq sabaq barysynda oqýshylar aqparattyq, ınnovasııalyq tehnologııalardy jáne vırtýaldy qosymshalarǵa negizdelgen ár túrli baǵdarlamalar men birqatar ádisterdi qoldaný arqyly maqalany joǵary deńgeıde talqylap shyqty. Árıne 1 saǵat kóleminde Elbasynyń kótergen máselelerin sheshý múmkin emes, ony aldaǵy ýaqytta osyndaı ashyq sabaq sheńberinde talqylap qana qoımaı, praktıkamyzda iske asyrylýy qajet dep sanaımyn. Bizdiń oqýshylarymyz atalmysh maqalada aıtylǵan oı-pikirlerdi ári qaraı joǵary dárejede, zamanaýı túrde jańasha kózqaraspen iske asyrady degen oıdamyn", - deıdi «Bilim-Innovasııa» lıseıleriniń ádiskeri Satanov Arystan Bolatuly.
"Maǵan sabaq óte unady, qyzyqty ótti. Sabaq barysynda Elbasynyń jańa maqalasyn taldaý arqyly, tarıhqa negizdelgen qujatta bolashaqqa baǵdar beretin naqty tapsyrmalar aıqyn kórsetilgenine kóz jetkizdim", - dep óz pikirin bildirdi Astana qalalyq «Bilim-Innovasııa» lıseıiniń 10-synyp oqýshysy Ábsatarov Aımar.
Sondaı-aq ashyq sabaq barysynda Elbasy N.Á.Nazarbaevtyń «Ulttyq tárbıe modeli: Rýhanı jańǵyrý» baǵdarlamasyn iske asyrý jáne «Uly dalanyń jeti qyry» atty maqalasyn mektepte iske asyrý jolynda oqýshylardyń áleýmettik belsendilik, mádenı, óner, sport, naqty aıtqanda jan-jaqty daǵdylaryn qalyptastyrý maqsatynda balamasy joq «Mádenı pasport» jobasymen tanystyryldy.