Almatydaǵy Balýan Sholaq atyndaǵy sport saraıynda qazaq kúresinen ótken «Álem Barysy-2018» týrnıri óz máresine jetti. Dúbirli dodaǵa álemniń birqatar elinen kelgen 33 balýan qatyssa, Qazaqstan namysyn 5 sportshy qorǵady.
Kil myqtylar arasynan sýyrylyp shyqqan Qazaqstannyń eki balýany – Aıbek Nuǵymarov pen Ersultan Muzafarov fınalda kezdesti. 4 mınýtqa sozylǵan beldesýde Nuǵymarov qarsylasyn taza jeńip, eki dúrkin «Álem Barysy» ataǵyn ıelendi. Jartylaı fınaldyq saıysta Ersultan Muzafarov Reseı balýany Roman Bobıkovtan basym tússe, Aıbek Nuǵymarov grýzın balýany Gýram Týshıshvılıdi jeńgen edi.
Reseılik balýan Roman Bobıkov beldesýsiz-aq «Álem Barysynda» úshinshi oryn ıelendi. О́ıtkeni onyń grýzııalyq qarsylasy Gýram Týshıshvılı bozkilemge shyqpaı qoıdy.
Álı BITО́RE,
«Egemen Qazaqstan»