Almaty oblysynyń О́tegen batyr aýylynda «Progress» polıtehnıkalyq kolledjinde múgedek jandardyń halyqaralyq kúni atalyp ótildi. BUU sheshimi boıynsha 1992 jyldyń 3 jeltoqsany Halyqaralyq múgedekter kúni bolyp bekitilgen.
Búginde Ile aýdanynda 3000-nan astam múgedekter tirkelgen. Olardyń negizgi tabysy memlekettik áleýmettik qamsyzdandyrý esebinen júzege asady. Osyndaı múmkindigi shekteýli adamdarǵa kómek kórsetý jáne olardy áleýmettendirý maqsatynda Ile aýdanynda kásiptik sharalar turaqty júzege asyp keledi. Osy oraıda «Fılıp Morrıs Qazaqstan» kompanııasy (FMQ) men «Progress» polıtehnıkalyq kolledjiniń birlesken jobasyn erekshe atap ótýge bolady. Mundaǵy maqsat osy sanattaǵy azamattarǵa eńbek naryǵynda básekege qabiletti bolýǵa, óziniń ál-aýqatyn arttyrýǵa jáne qarjylyq táýelsizdikke qol jetkizýge múmkindik berý.
Joba aıasynda múgedek jandardy túrli mamandyqtarǵa oqytý baǵdarlamalary júzege asýda. Qazirgi kezde erekshe qajettilikteri bar 30 azamatqa tiginshi, naýbaıshy, aspazshy, massaj mamany, aıaq kıim tigý sheberi, sabyn qaınatý sheberi, kompıýterlik saýattylyqty ıgerý boıynsha dárister júrgizilýde. Kásibı oqytýmen qatar bilim alýshylar úshin aqparat jáne tájirıbe almasý, shaǵyn bıznesti damytý jáne basqa da qyzyqty klýbtar jumysy jolǵa qoıylǵan.
«Progress» polıtehnıkalyq kolledjiniń dırektory Janna Telpekbaevanyń aıtýynsha, mundaı jobalar múgedekterge qoǵamnyń tolyqqandy múshesi bolýǵa, óz jolyn tabýǵa jáne paıdaly ári qarjylaı táýelsiz bolýǵa múmkindik beredi.
Osyndaı jobalar júzege asqan 8 jyl ishinde «Fılıp Morrıs Qazaqstan» kompanııasy 40 mıllıon teńgege jýyq qarjy bólgen. Bul qarajat múmkindigi shekteýli adamdardy túrli mamandyqtarǵa oqytýǵa, muǵalimderdiń jalaqysyna, kýrsty oqytýǵa arnalǵan materıaldardy alýǵa baǵyttalýda. Osy jyldarda 240 adam oqytylyp, olar búginde qoǵamnyń túrli salasynda belsendi eńbek etip keledi.
Tarata aıtyp ótetin bolsaq, olardyń 60-y «Mega» jáne «Spýtnık» saýda-oıyn-saýyq ortalyqtaryndaǵy kıim jáne aıaq kıim jóndeý sheberhanasyna, Almaty qalasynyń estý qabileti buzylǵan adamdarǵa arnalǵan óndiristik birlestigine, kıim jáne arnaıy kıim tigý kompanııalaryna jumysqa ornalassa, 40 adam jeke kásip salasynda eńbek etýde. «Progress» polıtehnıkalyq kolledjinde tigin sheberhanasynda qyzmet etetin 10 adam óz ónimderin óndirip, Ile aýdanynda uıymdastyrylǵan jármeńkelerde satýǵa múmkindigi bar. Al 7-ýi sańyraýqulaq ósirýge mashyqtanǵan. Sańyraýqulaqtardy ósirý, saqtaý jáne ótkizý joldary men ádisterin úırenýde azyq-túlik daqyldaryn ósirý salasyndaǵy ǵylymı mekemelerdiń kómegi zor. Sondaı-aq 10 adam nan-toqash ónimderine jeke tapsyrys alsa, 20 adam «Atameken» UKP oqytý baǵdarlamasy arqyly óz bıznesin uıymdastyrý boıynsha biliktiligin arttyrdy.
Elvıra Serikqyzy,
«Egemen Qazaqstan»