«Nur Otan» partııasy Tóraǵasynyń Birinshi orynbasary Máýlen Áshimbaev Táýelsizdik merekesin erekshe toılaýǵa shaqyrdy.
Bul týraly pikirin M.Áshimbaev óziniń Facebook jelisindegi paraqshasynda bólisti. Onyń sózine qaraǵanda, Táýelsizdik kúni eldigimizdiń boıtumaryna aınalyp, halqymyz úshin qasterli ári qasıetti merekege aınaldy.
«Azattyqtyń arqasynda álemdik qaýymdastyqqa etene enip, onyń tolyq múshesi atandyq. Eshkimge jaltaqtamaı, erteńimizdi ózimiz baǵamdaıtyn, saıasatymyzdy ulttyq múddege saı júrgizetin deńgeıge jettik.
Elbasymyzdyń dana basshylyǵymen táýelsizdik jyldarynda el damýynyń jańa ekonomıkalyq jáne saıası negizi qalyptasty. Halyqtyń ál-aýqaty men álemdik deńgeıdegi abyroı-bedelimiz de aıtarlyqtaı arta tústi. Sondyqtan Táýelsizdik kúnin atap ótýde Otanǵa degen mahabbattyń jarqyn úlgisin kórsetý ár qazaqstandyqtyń azamattyq boryshy bolýy tıis. Ol úshin memlekettik deńgeıdegi merekelik is-sharalarmen shektelmeı, ár adam táýelsizdik meıramyn toılaýǵa az da bolsa óz úlesin qosýǵa tyrysýy qajet», deıdi M.Áshimbaev.
Sondaı-aq partııa Tóraǵasynyń Birinshi orynbasary kásipkerler men kásiporyndardy jáne halyqqa qyzmet kórsetip otyrǵan jeke uıymdardy Táýelsizdik kúnin naǵyz eldiktiń, egemendiktiń merekesi retinde atap ótýge shaqyrdy.
«Mereke kúnderi sóreler memlekettik rámizderdiń túsimen bezendirilip, qyzmetkerler ulttyq naqyshqa saı kıimder kıse, saýda oryndarynda arnaıy aksııalar men jeńildikter sııaqty biregeı bastamalar qolǵa alynsa merekeniń mańyzy men máni odan ári arta túsetini anyq.
Qalaı desek te, bul kúnderi ár qazaqstandyq merekelik kóńil-kúıge bólenip, barlyq qoǵamdyq oryndarda táýelsizdiktiń máni men mańyzy aıqyn sezilip turýy tıis. Sol kezde biz ata-babamyz ańsaǵan azattyqtyń baǵasyn paıymdap, jańa Qazaqstan tarıhyndaǵy eń ulyq kúnge degen qurmetimizdi kórseter edik.
Eger osy bastamaǵa bárimiz bir kisideı atsalysyp, óz úlesimizdi qossaq, Táýelsizdik kúniniń shyn máninde jalpyulttyq jáne ár qazaqstandyqtyń asyǵa kútetin eń basty merekesine aınalatynyna kámil senemin», dedi M.Áshimbaev Facebook jelisindegi paraqshasynda.