«Aımaqtardy damytý-2020» memlekettik baǵdarlamasy aıasynda Ekibastuz qalasynyń Shıqyldaq aýylynda sý qubyry iske qosyldy.
Aýylǵa sý qubyryn tartý úshin uńǵymalar qazylǵaly biraz ýaqyt ótken bolatyn. Tipti, Shıqyldaqtyń sý qoryna 2 jyl boıy zertteý jumystary júrgizildi. Bul maqsatqa qalalyq bıýdjetten 10 mıllıon teńge bólindi.
– Sý qubyry qashan tartylar dep kútip júrdik. Al aýylda burynnan beri jumys istep turǵan uńǵymalar bar. Qubyrdy osy uńǵymalardan-aq tartýǵa bolar edi. Sý qory mol, sapasy da jaqsy, – deıdi turǵyndar.
Igiliktiń erte-keshi joq. Aýyl turǵyndaryn qýantqan bul ıgilikti iske qazir bári de yrza. Sý qubyryn jańǵyrtý jumysyna respýblıkalyq bıýdjetten 215,8 mıllıon teńge bólingen. Aýyzsýdy úzdiksiz berý úshin qos rezervýar, sý munarasy ornatylǵan. Sý qubyrynyń uzyndyǵy – 10,2 shaqyrym. Endi aýyldyqtar táýligine 12 tekshe metrge deıin sý alatyn bolady.
Sý qubyryn qaıta jóndeý jumysyn «Gıdroprom» JShS júrgizdi. Merdiger Islambek Qultumanovtyń aıtýynsha, sý qubyryn tartý, jóndeý jumystary bıyl maýsym aıynda bastalǵan.
Merdigerdiń mindeti – sýdy aýyldaǵy sý toltyrý rezervýarlaryna deıin jetkizý jáne úsh satyly sý tazartý qurylǵysyn ornatý. Bul jumys josparǵa saı oryndaldy. Endi syıymdylyǵy 500 tekshe metr eki rezervýardaǵy sý qubyr arqyly úılerge jetedi.
Aýylda 500-den astam turǵyn turady. Aýyzsý qubyr arqyly turǵyn úılerge, mektepke, ambýlatorııaǵa, mádenıet úıine, ákimdikke jetti. Aýyldyń mektebi, balabaqshasy, dárigerlik bólimshe jumys istep tur. Shıqyldaqta «Jarsor», «Jańa aýyl», «NOMAD», «Rodomanov», «Imanmahmut» sııaqty 20-ǵa jýyq sharýa qojalyǵy bar.
J. Aımaýytov jazǵan «Kúnikeıdiń jazyǵy» áńgimesindegi oqıǵa osy Shıqyldaq aýylynyń mańynda ótipti. Keıipkeri de osy aýyldan. Shıqyldaq degen kól de bar, bastysy Shıqyldaq degen bir áýlettiń atasy, adamnyń esimi.
Turǵyndardyń aıtýynsha, jylda kóktem kezinde Q.Sátbaev atyndaǵy sý arnasy arqyly aýyldaǵy ózenderge, Shıqyldaq kóline sý molynan jiberiledi. Qazir Tuzdykóldiń sýy móldir, tazaryp, tipti balyqtar júzip júr. Bastysy – arnadan keletin osy mol sý ysyrapsyz, aýyldyń yryzdyǵyna paıdalanylýda.
Sonymen birge qalaǵa qarasty Bozshakól stansasynyń turǵyndary da endi «Aımaqtardy damytý-2020» memlekettik baǵdarlamasy arqyly stansaǵa sý qubyry arqyly keletin Q. Sátbaev atyndaǵy arna sýyn paıdalana alady.
Farıda BYQAI,
«Egemen Qazaqstan»
Ekibastuz qalasy