Abaı atyndaǵy Qazaq ulttyq pedagogıkalyq ýnıversıtetinde «Muǵalim mártebesi týraly» Zań jobasyn talqylaýǵa baılanysty Almaty qalasy mektepteri, kolledjderi men joǵary oqý oryndarynyń basshylary, ustazdary, ǵalymdardyń qatysýymen arnaıy keńes ótti.
Keńeske Bilim jáne ǵylym vıse-mınıstri Elmıra Sýhanberdıeva qatysyp, Memleket basshysynyń tapsyrmasyn júzege asyrý aıasynda daıyndalǵan zań jobasynyń mańyzdylyǵyna toqtaldy. Sondaı-aq pedagog mártebesin arttyrýǵa baǵyttalǵan barlyq múmkindikterdiń qarastyrylyp otyrǵandyǵyn jetkizdi.
Qazirgi kezde atalǵan mınıstrliktiń saıtynda, áleýmettik jelilerde zań jobasyna qatysty qyzý talqylaý júrip jatyr. Zań jobasyn ázirleýge baılanysty 78 adamnan qurylǵan komıssııa quramynda ǵalymdar, ustazdar men depýtattar bar. Aınalasy bir aıdyń ishinde zań jobasy súzgiden ótkizilip, endigi kezekte kásibı ortaǵa tanystyrylyp, talqylaý jumystary jalǵasyn tabýda.
Elmıra Sýhanberdıevanyń aıtýynsha, Bilim jáne ǵylym mınıstrliginiń saıtyna elimizdiń barlyq óńirlerinen segiz júzden astam usynys kelip túsken. Qazirgi kezde elimizde 300 myńnan asa muǵalim eńbek etse, atalǵan zańǵa qatysty kez kelgen sala mamany óziniń pikirin bildire alady. Jumys toby barlyq óńirlerdi aralap, talqylaýlarǵa qasady. Mınıstrdiń tapsyrmasy boıynsha zań jobasynan árbir muǵalim habardar bolýy qajet. Osyǵan oraı ár mektep ujymy arnaıy siltemede kórsetilgen zań jobasymen tanysyp, óz pikirlerin, usynystaryn joldaıtyn bolady.
BǴM Mektepke deıingi jáne orta bilim departamenti dırektorynyń orynbasary Sáýle Qabımoldaeva pedagogıkalyq qaýymdastyqtyń qatysýymen ázirlengen zań jobasynyń kóterip otyrǵan júgi pedagog mártebesin arttyrýmen sıpattalatyndyǵyn jetkizdi. Sondaı-aq zań jobasy barlyq bilim berý mekemelerinde eńbek etip júrgen ustazdardyń áleýmettik dárejesin anyqtap, olarǵa qoldaý kórsetýge baǵyttalǵandyǵyn atap ótip, 6 bólim, 21 baptan turatyn qujattaǵy mańyzdy máselelerge toqtaldy.
Zań jobasyn talqylaýǵa arnalǵan keńeste muǵalimderdiń, mektep dırektorlary men kolledjder oqytýshylarynyń pikirleri men usynystary tyńdaldy. Turǵyn úı, medısınalyq saqtandyrý, zeınet jasy, muǵalimderdiń júktemesin jeńildetý, muǵalim men ata-ananyń mindeti, quqyǵy turǵysyndaǵy, sondaı-aq mektep muǵalimi men joǵary oqý oryndary oqytýshylarynyń mindeti, eńbek aqysy jáne de biliktilikti tekserýge arnalǵan testke baılanysty kóptegen túıtkildi máseleler aıtyldy. Vıse-mınıstr Elmıra Sýhanberdıeva zań jobasynda bul usynystardyń tolyqtaı eskerilgendigin ári ustazdar tarapynan aıtylǵan áribir pikirdiń qundy ekendigine toqtaldy. Ustazdar qaýymy úshin mártebeli qujattyń joǵary deńgeıde daıyndalyp, salaǵa qatysty kez kelgen máseleni tolyǵymen qamtýy qoǵam keleshegi úshin asa mańyzdy.
Elvıra Serikqyzy,
«Egemen Qazaqstan»
ALMATY