Búgin Astana qalasynyń «Jastar» saraıynda Qazaqstan Respýblıkasy Ulttyq ulanynyń Úlgilik-kórsetimdi orkestri men Án-bı ansambli elimizdiń Táýelsizdik kúnine oraı «Týǵan jerim - tuǵyrym» atty merekelik konsert ótkizdi. Atalmysh shara Astana qalasy Baıqońyr ákimdiginiń qoldaýymen birlese ótken bolatyn. Saltanatty jaǵdaıda zalǵa Baıqońyr aýdanynyń turǵyndary, mektep oqýshylary, mekeme basshylary, ásker ardagerleri jınaldy, dep habarlaıdy Ulttyq ulanyń baspasóz qyzmeti.
Aldymen táýelsizdigimiz týraly syr sherter derekti fılm kórermender nazaryna usynyldy. Artynsha minberge Baıqońyr aýdanynyń ákimi Erlan Kanalımov kóterilip, barsha jurtty elimizdiń basty merekesi Táýelsizdik kúni merekesimen quttyqtady.
- Táýelsizdik basty baılyǵymyz, qun jetpes qundylyǵymyz. 27 jyl ishinde elimiz barlyq salada alǵa shyǵyp, úlken damý jolynan ótti, - dedi aýdan ákimi.
Quttyqtaý sózden keıin aýdan basshysy birqatar ákimdik qyzmetkerleri men aýdandaǵy mekeme basshylaryn «Astanaǵa 20 jyl» merekelik medalmen marapattady.
Alaıda, bul marapattardy sońy emes edi. Sahnaǵa Qazaqstan Respýblıkasy Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Muhametqalı Satov shyǵyp, aýdan turǵyndaryna Ulttyq ulan Bas qolbasshysy general-leıtenant Rýslan Jaqsylyqovtyń quttyqtaýyn jetkizdi. Sondaı-aq, el aldynda merekege oraı Baıqońyr aýdanynyń ákimi Erlan Kanalımov Ultyq ulanmen aradaǵy yntymaqtastyqty nyǵaıtýǵa qosqan úlesi úshin II – dárejeli «Ulttyq ulan qyzmetiniń úzdigi» keýde belgisimen marapattaldy. Ultyq ulannyń Bas tálimgeri el aldynda aýdan basshysynyń keýdesine nagradany óz qolymen taqty.
Saltanatty shara Ulttyq ulan áskerı-orkestrlik ortalyǵynyń bastyǵy podpolkovnık Ashat Muhamedııarov bastaǵan Úlgilik-kórsetimdi orkestri jáne Án-bı ansambliniń bastyǵy kapıtan Darhan Rahymǵalıev jetekshilik etken ónerpazdardyń konserttik baǵdarlamasymen ulasty. IV Jalpyreseılik baıqaýdyń III dárejeli laýreaty, Ulttyq ulannyń án-bı ansambliniń solısi Nematıllo Zkrýllaev, otandyq estrada juldyzy Murat Qoja, ulandyq ánshiler, elimizdiń eńbek sińirgen qaıratkeri Murat Nurǵazıev, Denıs Iаkovlev, Ǵaını Jumasheva óner kórsetse, myń buralǵan bıshiler de ónerlerin ortaǵa saldy.
Ártisterdiń sahnaǵa shyǵýy bir-birine uqsamady. Sándi kostıýmder, jarqyn obrazdar, kórkin ashar taqyrypty beınerolıkter kórermendi eljiretti.
Shara sońynda ulandyq ónerpazdarǵa Baıqońyr aýdanynyń ákimi atynan yqylas gúli usynyldy.